मंसिर १५ धनगढी । सुदूरपश्चिम प्रदेश लोक सेवा आयोगले आर्थिक वर्ष २०८१÷८२ को सहायक पाँचौ तहको विभिन्न एघार सेवा र समूहको ६९ पदका लागि २१ हजार ८ सय ३० जनाले आवेदन दिएका छन् । प्रदेश लोक सेवा आयोगले सार्वजनिक गरेको विज्ञपन अनुसार सहायक पाँचौ तहको ६९ पदका लागि २१ हजार ८ सय ३० जनाले आवेदन दिएका हुन ।
गत आर्थिक वर्षमा प्रदेश लोक सेवा आयोगले कम्प्युटर अपरेटर, फार्मेसी सहायक, ल्याब टेक्निसियन, कविराज, पब्लिक हेल्थ नर्स, स्टाफ नर्स, रेन्जर, पशु तथा कृषि प्राविधक, सव–इन्जिनियर र प्रशासन सहायक÷ लेखापालका लागि विज्ञापन गरेको थियो । लोक सेवा आयोगले मंसिर ११ गते विभिन्न प्राविधिक र अप्राविधक सहायक पाँचौ तहका लागि आएका दरखास्त मध्ये २१ हजार ८ सय ३० जनाको आवेदन स्वीकृत भएको विवरण सर्वाजनिक गरेको छ ।
प्रदेश लोक सेवा आयोगले प्रशासन सहायक÷ लेखापाल पदका लागि २९ दरबन्दीका लागि विज्ञापन गरेकोमा सबैभन्दा धेरै आवेदन दर्ता भएका छन् । प्रशासन सहायकका लागि नौ हजार ८ सय ३५ जनाले आवेदन दिएका छन् । पाँचौ तहको प्रशासन सहायक पछि दोस्रोमा सव–इन्जिनियरको ९ पदका लागि चार हजार २ सय ६३ जनाले आवेदन दिएका छन ।
प्रदेश लोक सेवा आयोगले कृषि प्राविधिकतर्फ तीन सिटका लागि विज्ञापन गरेकोमा दुई हजार ८ सय ४० जनाको आवेदन परेको छ भने कम्प्युटर अपरेटरका लागी पाँच जनाको विज्ञापन खोलेकोमा एक हजार ५ सय ३० जनाले आबेदन दिएका छन । त्यसैगरी रेन्जर पदको १३ जनाका लागी एक हजार २ सय ८६ जनाको आवेदन परेको छ भने पशु सेवा प्राविधिक दुई सिटका लागि ९ सय ४ जनाले आबेदन दिएका छन ।
त्यसैगरी दुई जना स्टाफ नर्सका लागि ३ सय ४ जनाको आवेदन परेको छ भने तीन जनाकोे पब्लिक हेल्थ नर्सका लागि २ सय ८८ जनाको निवेदन परेको छ । कविराज पदका लागी एक जनाको विज्ञापन जारी गरेकोमा १ सय २८ जनाको र ल्याब टेक्निसियनको एउटा पदका लागि २ सय ५१ जनाको आबेदन परेको छ । फार्मेसी सहायकको एक पदका लागि २ सय १ जनाको आवेदन परेको छ ।
