मंसिर १४ डडेलधुरा । डडेलधुरा अस्पतालमा दुई सिफ्टमा ओपीडी सेवा सञ्चालन गरिएको छ । बिरामीको चाप र अस्पतालबाट दिइने सुविधा थप र व्यवस्थित गर्नका लागि बिहान र बेलुकाको समयमा ओपीडी सेवा सुचारु गरिएको हो ।
यसअघि एकै सिफ्टमा ओपीडी सेवा सञ्चालन हुँदा बिरामीलाई पालो कुर्न, टिकट काट्न र उपचार सेवा पाउन समस्या हुने गरेको अबश्थामा दुई सिफ्टमा ओपीडी सेवा सञ्चालन गरिए पछि सहज भएको छ ।
दिउँसो २ बजेपछि ओपीडी सेवा बन्द गरिँदा सुदूरपश्चिमका सात वटा पहाडी जिल्लाका बिरामीहरूले इमर्जेन्सी टिकट काट्नु पर्ने वा अर्को दिन अस्पताल धाउनु पर्ने बाध्यता अहिले हटेको छ । पहिलो पटक अस्पतालले दरबन्दी अनुसार ११औं तह मेडिकल सुपेरिटेन्डेन्टको रुपमा पाएपछि बिरामीको मर्का र समयलाई हेरी दुई सिफ्टमा ओपीडी सेवा सञ्चालन गरिएको हो ।
संघीय सरकारको मातहतमा रहेको डडेलधुरा अस्पतालमा दिउँसो २ बजेपछि ओपीडी सेवा बन्द हुने गरेकोमा हाल आएर दुई सिफ्टमा ओपीडी सेवा सञ्चालनमा आएसँगै बिरामीलाई इमर्जेन्सी टिकट काट्नु पर्ने वाध्यताको अन्त्य भएको अस्पतालका मेडिकल सुपेरिटेन्डेन्ट डा. सुधा देवकोटाले जानकारी गराईन ।
अहिले बिरामीको उपचार ओपीडीबाट सहज रूपमा हने गरेको उनले बताईन । मेसु डा. देवकोटाले २ बजेपछि अस्पताल पुग्ने बिरामीहरूले टिकट नपाउने अवस्थाको अन्त्य भएको बताईन । ओपीडीमा बस्ने डाक्टर वा मेडिकल अधिकृतले म हेर्दिन भनेपछि टिकट नपाउने र अन्यत्र जानु पर्ने बाध्यतालाई हटाउनका लागि र जुनसुकै समयमा पनि बिरामी उपचार गर्न आउँदा कार्यालय समयमा उपचार पाउनु पर्ने व्यवस्था मिलाउन दुई सिफ्टमा ओपीडी सेवा सञ्चालन गरी उपचारसेवा विस्तार गरिएको उनले बताईन ।
उनका अनुसार हाल ओपीडी सेवा पहिलो सिफ्टमा दिउँसो १२ः३० बजेसम्म र दोस्रो सिफ्ट १ः३० बजेदेखि हुने गरेको छ । बीचमा चिकित्सकलाई एक घण्टा खाजाको समय दिई चिसोयाममा डेढ घण्टा र गर्मीयाममा दुई घण्टा सम्म दोस्रो सिफ्टको ओपीडी सञ्चालन भइरहेको उनले बताईन । दिउँसोपछि अस्पताल टाढाका बिरामीहरूले पनि सरल उपचार सेवा पाइरहेका छन् ।
इमर्जेन्सीमा एक सय रुपैयाँको टिकट काट्नुपर्ने झन्झट पनि हटेको उनले बताइन् । डडेलधुरा अस्पताल सुदूरपश्चिम प्रदेशको एक मात्रै संघीय सरकार मातहत रहेको विशेष विशेषज्ञ चिकित्सक सेवा सहितको अस्पताल भएको उनले बताईन । दरबन्दी अनुसारका विशेषज्ञ चिकित्सक नहुँदा बिरामीले सहज उपचार पाउन नसकेको गुनासो आउने गरेको छ ।
मेसुका अनुसार हाल अस्पतालमा १९ जना विशेषज्ञ चिकित्सक रहेका छन् भने २५ जना मेडिकल अधिकृत कार्यरत रहेका छन् । मुख्य समस्याका रूपमा पुग्ने बिरामी बालबालिका रहेको उनले बताईन । चाँडै बालरोग विशेषज्ञ चिकित्सक अस्पतालले पाउने मेसु डा. देवकोटाले जानकारी गराईन ।
