मंसिर ०६ बैतडी । ब्राह्मण र दलित पण्डितले संयुक्त रुपमा वैदिक संस्कार अनुसार दलितको विवाह सम्पन्न गरेका छन । यही मंसिर ५ गतेका दिन बैतडीको दशरथ चन्द नगरपालिका वडा नम्बर–१० बुड्डाका पंकज परियार र दार्चुलाको मालिकार्जुन गाउँपालिका वडा नम्बर–७ डिन्सीकी सुनिता परियारको विवाह ब्राह्मण र दलित पण्डितले संयुक्त रुपमा वैदिक संस्कार अनुसार सम्पन्न गरेका हुन ।
पण्डित गणेश पन्तसँगै नारायण मिश्र र दलित समुदायका पण्डित जनक शर्मा विश्वकर्माले संयुक्त रूपमा विवाह विधि सञ्चालन गर्दै पंकज र सुनिताको विवाह संस्कार सम्पन्न गराएका हुन् । पंकज र सुनिताको विवाहले हिन्दू धार्मिक संस्कार सबैका लागि समान रूपमा खुला रहेको स्पष्ट सन्देश दिएको छ । विवाह समारोहमा रहेका पण्डितहरूले धर्म जातले होइन, आचरण र मानवताको आधारमा परिभाषित हुने कुरा बताएका छन् ।
उनीहरूले हिन्दू वैदिक संस्कारमा कुनै जातीय अवरोध नभएको र सबैलाई समान अधिकार भएको बताएका छन । यस्तो संयुक्त सहभागिताले धार्मिक समावेशिताको एउटा सकारात्मक रूप समाजमा प्रस्तुत गरेको पण्डित गणेशप्रसाद पन्तले बताए । विवाह पछि आयोजना गरिएको भोज समारोहले कार्यक्रमलाई अझै अर्थपूर्ण बनाएको बताईएको छ ।
सबै समुदायका मानिसहरूले एउटै स्थानमा बसेर एउटै स्थानमा खाना खाएर सामाजिक सद्भावको सशक्त उदाहरण प्रस्तुत गरेको पण्डित पन्तले बताए । वर–वधु पंकज परियार र सुनिता परियारले आफ्नो वैवाहिक समारोहले समाजमा यति ठूलो सकारात्मक सन्देश दिन सफल भएकोमा खुसी प्रकट गरेका छन । उनीहरूले यस्तो पहलले दलित तथा सबै समुदायका मानिसहरूलाई धार्मिक संस्कारमा समान अवसर मिल्नु पर्छ भन्ने धारणालाई बलियो बनाएको बताएका छन ।
विवाह केवल दुई व्यक्तिको वैवाहिक मिलन मात्र नभई समाजलाई समानता, सम्मान र धार्मिक एकताका दिशातर्फ अघि बढाउने ऐतिहासिक कदमका रूपमा देखिएको छ । एउटै विधि, एउटै स्थान र एउटै थालीमा भोजन गरेर सबै समुदायको सहभागिताले जातीय विभेद विरुद्ध सशक्त सन्देश दिएको छ ।
