मंसिर ०४ बझाङ । सुदूरपश्चिम प्रदेशका साइपाल र अपि क्षेत्रलाई पर्यटकीय गन्तव्यका रूपमा विकास गर्ने कार्यको थालनी भएको छ ।
नेपाल पर्यटन बोर्ड तथा सहारा नेपालद्वारा सञ्चालित दिगो पर्यटन परियोजनाद्वारा सुदूरपश्चिम प्रदेशका साइपाल र अपि क्षेत्रलाई पर्यटकीय गन्तव्यका रूपमा विकास गर्ने कार्यको थालनी भएको हो ।
परियोजनाले साइपाल गाउँपालिकाको साइपाल हिमाल देखि दार्चुलाको अपि हिमाल गाउँपालिकामा पर्ने अपि हिमाल आधार शिविर क्षेत्रसम्म पदमार्ग निर्माणको सम्भाव्यता अध्ययन गर्न थालेको सहारा नेपालका स्रोत व्यक्ति वसन्त बोहराले बताए ।
साइपाल देखि अपिसम्मको पर्यटकीय विकासका लागि पदमार्गमा निर्माण गर्नुपर्ने भौतिक संरचनाका साथै अन्य अत्यावश्यक पूर्वाधारबारे दुई साता अध्ययन गरिएको बताउदै उनले पहिलो चरणमा होमस्टे, विश्रामस्थल, पुलपुलेसा तथा पदमार्ग निर्माणका लागि अध्ययन गरिएको जानकारी गराए ।
स्थानीयको सहयोगमा पूर्वाधार निर्माण गर्न थालिने बताउदै उनले बझाङको साइपाल गाउँपालिकाको निलखटी हिमाल, सुर्मा गाउँपालिकाको बिरू ओडार र अपि हिमाल गाउँपालिकाको अपि आधार शिविर क्षेत्रको बीचमा पर्ने कालागाडमा पर्यटकका लागि धेरै संरचना बनाउनु पर्ने उनले बताए ।
त्यसैगरी पर्यटकीय क्षेत्रको विस्तारका लागि साइपाल गाउँपालिकाले विभिन्न संस्थासँगको साझेदारीमा पर्यटकीय संरचना निर्माण गरिरहेको गाउँपालिकाका इन्जिनियर सुशील बोहराले बताए ।
मानव बस्तीको अन्तिम गाउँ धुलीबाट अपि हिमालको आधार शिविरसम्म पुग्न एक साता भन्दा बढी पैदलयात्रा गर्नुपर्ने बताउदै उनले बीचमा पाँच हजार २ सय मिटर उचाइमा रहेको निलखटी हिमाल पार गरेर बिरू ओढार, कालागाड हुँदै अपिको फेदसम्म पुगिने जानकारी गराए ।
हिउँदमा हिमाल क्षेत्र पार गर्न नसके पनि अरु बेला पर्यटकलाई. यात्रा गर्न सहज हुने बताउदै उनले विगतमा साइपालबाट अपि जाने पर्यटकलाई पैदल यात्राको समस्या हुने गरेको बताए । अब त्यो समस्या हट्ने बताउदै उनले अर्को वर्षदेखि पर्यटकले बाटोमा बासका साथै खाना पनि पाउने बताए ।
पर्यटकका लागि आधारभूत संरचना निर्माण गरिने बताउदै उनले धुलीभन्दा माथि सञ्चारको समस्या भएकाले नेपाल टेलिकमसँगको साझेदारीमा त्यो समाधान गर्न सकिने उनले बताए ।
अहिले धेरै समस्या नेटवर्कको भएको बताउदै उनले चार हजार तीन सय मिटर उचाइमा रहेको निलखटी पाटन सम्म मात्रै नेटवर्क हुने जानकारी गराए । हाल पर्यटकहरू साइपालबाट ताक्लाकोट नाका वा उरै लेकसम्म जाने गरेको जानकारी गराउदै उनले निलखटी हुँदै अपिसम्म जानेहरू खासै नभेटिएको बताए ।
त्यसैगरी साइपाल गाउँपालिका वडा नम्बर–३ का गोपी बोहराले पदमार्ग नभएकाले साइपालका सुन्दर स्थल आन्तरिक एवं बाह्य पर्यटकले देख्न नपाएको बताए ।
पैदलमार्ग नभएकाले आएका केही पर्यटक पनि फर्कने गरेको बताउदै उनले अब बाटो खुलेपछि ताक्लाकोट जानेभन्दा बढी पर्यटकले साइपाल–अपि रूटबाट यात्रा गर्ने बताए ।
साइपाल गाउँपालिका–४ धुलीका उमेश रोकायाले पर्यटक आए पछि स्थानीयका लागि रोजगारीका अवसर सृजना हुने बताए । साइपालमा सयौँ पर्यटकीय स्थल भएको बताउदै उनले पर्यटक आउने वातावरण बन्दै र्गएको बताए ।
केही नभए पनि भरिया र सहयोगीले काम पाउने बताउदै उनले। अपि–साइपाल क्षेत्रमा बाटो बने पछि बेमौसममा पनि स्थानीयले काम पाउने उनले बताए ।
