कार्तिक २७ डडेल्धुरा । डडेल्धुराको कीर्तिपुरमा निर्माण हुन लागेको सभाहलको निर्माण कार्य अलपत्र परेको छ । सरकारी तथा निजी दुवै क्षेत्रमा सभाहलको अभाव भएकाले पूर्वाधारको आवश्यकता महसुस गरी सुरु गरिएको सभाहल निर्माणको काम अलपत्र परेको हो ।
जिल्ला समन्वय समिति डडेल्धुराका प्रमुख गगनसिंह भण्डारीले सुदूरपश्चिम प्रदेश सरकारको भौतिक पूर्वाधार मन्त्रालय मार्फत सभाहल निर्माणको प्रस्ताव स्वीकृत भएपछि जिल्ला समन्वय समितिको पहलमा काम थालिएको जानकारी गराए ।
डडेल्धुरामा सभाहल अत्यावश्यक भएको भन्दै यसका लागि पहल गरेको बताए ।ं दुई करोड पाँच लाख रुपैयाँ लागतमा दुई सय जना अट्ने क्षमता भएको सभाहल निर्माण गर्ने योजना बनाइएकोबताउदै उनले अहिले काम अलपत्र परेको बताए ।
पहिलो पटक आर्थिक वर्ष २०७९÷८० मा जग हालेर पिलरका लागि फलामका छड ठड्याइए पनि त्यसपछि काम अगाडि नबढेको उनले बताए । अहिले जगमा झारपात पलाइसकेको बताउदै उनले निर्माण स्थल जीर्ण अवस्थामा पुगेको बताए ।
जिल्ला समन्वय समितिको कार्यालय रहेको कीर्तिपुरको जग्गामा सभाहल निर्माण गर्नका लागि जग खनिएको बताउदै उनले पहिलो वर्ष ४० लाख रुपैयाँ खर्च गरी जग खनिएको र संरचना तयार पारिएको भए पनि त्यसपछि काम ठप्प भएको उनले बताए ।
सहरी विकास तथा भवन कार्यालयलाई पटक–पटक पत्राचार गरेको भए पनि कामले निरन्तरता पाउन नसकेको जिल्ला समन्वय समिति प्रमुख भण्डारीले बताए । भण्डारीका अनुसार आर्थिक वर्ष २०८१÷८२ मा सुदूरपश्चिम प्रदेश सरकारको भौतिक पूर्वाधार मन्त्रालयले ४५ लाख रुपैयाँ विनियोजन गरेको थियो ।
सहरी विकास तथा भवन कार्यालयले भवन निर्माणको जिम्मा पाएकोमा कार्यालयले निर्माण कम्पनीलाई कार्यादेश नदिँदा काम अघि बढ्न नसकेको बताईएको छ । फलस्वरूप रकम फ्रिज हुन गएको बताइएको छ ।
सभाहल निर्माणका लागि दुई करोड पाँचलाख रुपैयाँ लागत अनुमान सहित बहुवर्षीय योजना अन्तर्गत २०७९ सालमा ठेक्का आह्वान गरिएको थियो । पहिलो वर्षको काममा जग हाल्ने कार्य सम्पन्न भएको थियो ।
दोस्रो वर्ष बजेट नपर्दा काम रोकिएको थियो । पछिल्लो वर्ष केही रकम विनियोजन भए पनि विविध प्राविधिक समस्या देखाउदै काम अगाडी बढेको छैन ।
