कार्तिक २७ कञ्चनपुर । कञ्चनपुरमा तीन वर्षपछि नदीजन्य पदार्थ ढुङ्गा, गिट्टी, बालुवा र माटो उत्खनन गर्ने पाईने भएको छ ।
शुक्लाफाँटा राष्ट्रिय निकुञ्ज अन्तर्गतका छ वटा मध्यवर्ती क्षेत्रका नदी तथा खोलाबाट उत्खनन गर्दा निकुञ्जमा क्षति पुग्ने भन्दै २०७९ साल देखि उत्खननमा रोक लगाइएको भएपनि तीन वर्षपछि नदीजन्य पदार्थ ढुङ्गा, गिट्टी, बालुवा र माटो उत्खनन गर्न पाईने भएको हो ।
स्थानीयको माग र सर्वोच्च अदालतको अन्तरिम आदेशपछि उत्खनन गर्न पाईने भएको हो । शुक्लाफाँटा राष्ट्रिय निकुञ्जका वरिष्ठ संरक्षण अधिकृत चन्द्रशेखर चौधरीका अनुसार प्रतिबन्ध हटेसँगै उपभोक्ताका माग सङ्कलन गर्ने कार्य जारी रहेको छ ।
असोज ३१ गते बसेको मध्यवर्ती क्षेत्र व्यवस्थापन समितिको बैठकले उपभोक्ताले घरायसी प्रयोजनका लागि नदीजन्य पदार्थ प्रयोग गर्न पाउने निर्णय गरेको थियो । कात्तिक १६ गते देखि राष्ट्रिय निकुञ्ज तथा वन्यजन्तु संरक्षण ऐन, २०२९ र सम्बन्धित नियमावली अन्तर्गत नियमानुसार राजस्व लिएर उत्खनन गर्न निर्देशन दिइएको छ ।
हाल छ वटा घाटबाट उत्खनन गर्न पाईने निर्णय गरिएको छ । दोधारा चाँदनी नगरपालिका स्थित हिमालय मध्यवर्ती उपभोक्ता समितिले महाकाली नदीका दुई वटा घाटबाट उत्खनन प्रक्रिया अघि बढाएको जानकारी गराएको छ ।
झलारीस्थित सुनदेवी मध्यवर्ती उपभोक्ता समितिका अध्यक्ष भरतबहादुर विष्टले तीन वर्षदेखि उत्खनन रोकिँदा दोधाराका बस्तीहरू बाढी र डुबानको जोखिममा परेको बताए ।
सबै प्रक्रिया पूरा गरेर उपभोक्ताले आवश्यक नदीजन्य पदार्थ उत्खनन गर्न पाउने उनले बताए । निकुञ्जका सूचना अधिकारी पुरुषोत्तम वाग्लेका अनुसार, शुक्लाफाँटा मध्यवर्ती क्षेत्र अन्तर्गतका छ वटा घाटबाट करिब एक लाख २८ हजार ६ सय घनमिटर नदीजन्य पदार्थ उत्खनन गर्न सकिने छ ।
