सुदूरपश्चिम प्रदेशका मुख्यमन्त्री कमल बहादुर शाह प्रदेशका जिल्लाहरुको भ्रमणमा रहेका छन । मुख्यमन्त्री शाह कात्तिक २१ गते देखि प्रदेशका जिल्लाहरुको भ्रमणमा रहेका हुन । मुख्यमन्त्री शाहले प्रदेशका पाँच वटा जिल्लाको भ्रमण सकिसकेका छन् ।
शाहले डडेल्धुरा, बैतडी, दार्चुला, डोटी र अछाम जिल्लाको भ्रमण गरी सकेका छन । मुख्य मन्त्री शाहको बझाङ र बाजुरा समेत पुग्ने योजना रहे पनि समय अभावका कारण तत्काल सम्भव नहुने देखिएकाले ती जिल्लामा पनि चाँडै पुग्ने तयारी भइरहेको उनले बताएका छन् ।
मुख्यमन्त्री शाहले आफ्नो भ्रमणलाई कार्यालय बीचको सहकार्य, ऐन–कानुनमा देखिएका समस्या, योजना कार्यान्वयनको अवस्था र शान्ति–सुरक्षाको समग्र मूल्याङ्कनमा केन्द्रित गरेको बताएका छन ।
जेनजी आन्दोलन पछि संविधान र संघीय संरचनामाथि प्रश्न उठ्न थालेको बताउदै उनले यस्तो बेला सबै तहका प्रतिनिधि र नागरिकसँग प्रत्यक्ष संवाद आवश्यक भएकाले भ्रमणमा निस्किएको बताए । भ्रमणका क्रममा शाहले संघ, प्रदेश र स्थानीय तहबीच समन्वयको कमी रहेको निष्कर्ष निकालेका छन् ।
विभिन्न जिल्लामा भएका अन्तरक्रियाबाट प्राप्त सुझावलाई संकलन गरी समस्या समाधानका उपाय प्रदेश सरकारले अघि सार्ने उनले बताएका छन । विकास निर्माण र सुशासनका विषयमा शाहले मातहतका निकायहरूलाई कडा निर्देशन दिएको बताए ।
योजना कार्यान्वयनमा देखिएको बेथितिलाई रोक्न उनले स्पष्ट कार्यतालिका बनाएर अघि बढ्न निर्देशन दिएको बताए । विकासमा देखिएको भ्रष्टाचारको जड मानिने उपभोक्ता समितिको अवधारणालाई निरुत्साहित गर्ने नीति प्रदेश सरकारले लिएको पनि उनले बताए ।
भ्रमणका क्रममा शाहले राजनीतिक सन्देशहरू पनि दिएका छन् । नेपाली कांग्रेसका सभापति तथा पूर्वप्रधान मन्त्री शेरबहादुर देउवाको गृह जिल्ला डडेल्धुरामा उनले देउवालाई “देशलाई पाँच पटक नेतृत्व गर्ने व्यक्तित्व” भन्दै “यो भूमि पवित्र छ” भन्ने अभिव्यक्ति दिएका थिए ।
उनले देउवाको योगदानलाई स्मरण गर्दै जनताको अधिकारका लागि देउवाले सधैँ संघर्ष गरेको बताए । कहिल्यै विचलित नभएको बताउदै उनले सभापति देउवा र नेतृ आरजु राणा देउवालाई सिद्ध्याउने दिवास्वप्न देख्नेहरू विगतमा पनि सफल नभएको र भविष्यमा पनि हुन नसक्ने बताए ।
भ्रमणका क्रममा शाहले पार्टी भित्रको विवादबारे पनि धारणा राखेका छन । डोटीमा आयोजित कार्यक्रममा उनले कांग्रेस भित्र संवाद र सहमतिबाट समस्या समाधान खोज्नुपर्ने बताएका थिए ।
पार्टी भित्र उत्पन्न अन्तरविरोध मिलाउन महासमिति बैठक अविलम्ब बोलाइनुपर्ने बताउदै उनले सीमित व्यक्तिहरू नेतृत्व कब्जा गर्न विशेष महाधिवेशनको पक्षमा रहेको बताएका छन । यसले पार्टीलाई दीर्घकालीन रूपमा फाइदा नहुने पनि उनले बताएका छन ।
झन्डै एक साता लामो प्रदेश भ्रमणका क्रममा मुख्यमन्त्री शाहले सुदूरपश्चिमका जनप्रतिनिधि र नागरिकसँग प्रत्यक्ष संवाद गर्दै विकास, सुशासन, राजनीतिक स्थायित्व र पार्टी एकता सम्बन्धी छलफल गरेको बताइएको छ ।
प्रदेशका जिल्ला सदरमुकाम पुगेर स्थानीय तहका जनप्रतिनिधि, सरकारी कार्यालयका प्रमुखहरू, कर्मचारी तथा सर्वसाधारणसँग मुख्य मन्त्री शाहले छलफल र अन्तरक्रिया गरेको बताईएको छ ।
