कार्तिक २६ कञ्चनपुर । कञ्चनपुरको भीमदत्त नगरपालिका वडा नम्बर–१४ नयाँ कटानमा स्थापना भएको राना थारु समुदायद्वारा सञ्चालित सामुदायिक होमस्टेमा आन्तरिक तथा बाह्य पर्यटकहरूको आकर्षण बढ्दै गएको छ ।
शुक्लाफाँटा राष्ट्रिय निकुञ्जसँग जोडिएको राना थारु होमस्टेमा आन्तरिक तथा बाह्य पर्यटकहरूको आकर्षण बढ्दै गएको हो । हिउँद र फागुन देखि जेठ सम्म आन्तरिक तथा बाह्य पर्यटकहरूको आवागमन बढ्दै गएपछि होमस्टे आय आर्जनको स्रोत बन्दै गएको छ ।
राना थारु सामुदायिक होमस्टेका अध्यक्ष परशुराम रानाले गत वर्ष मात्रै तीन हजार पर्यटक बास बसेको बताए । निकुञ्जमा बाह्रसिङ्गे, चित्तल, बदेल, मयूर लगायतका वन्यजन्तु अवलोकन गर्न आउने पर्यटकहरु होमस्टेमै बस्न रुचाउने गरेको उनले बताए ।
हाल आठ वटा घरमा सञ्चालनमा रहेको होमस्टेबाट प्रत्येक घरले वार्षिक डेढ देखि दुई लाख रुपैयाँ सम्म आम्दानी गर्ने गरेको उनले बताए । पाहुनाले स्थानीय परिकार, राना थारु पहिरन र सांस्कृतिक नृत्यको समेत आनंद लिन पाउँने उनले बताए ।
भीमदत्त नगरपालिकाको नयाँ कटानसँगै कृष्णपुरको वाणी र शुक्लाफाँटा नगरपालिकाको जोनापुरमा पनि यस्तै होमस्टे सञ्चालनमा रहेका छन् । कञ्चनपुर उद्योग वाणिज्य सङ्घका सचिव राहुल भट्टले जिल्लाका होमस्टेहरु पर्यटक मैत्री र उपयोगी भएको बताए ।
निजी क्षेत्र, दातृ निकाय र स्थानीय समुदायको सहकार्यले होमस्टेहरूलाई थप सुदृढ बनाउन सकिने उनले बताए । शुक्लाफाँटा राष्ट्रिय निकुञ्ज भ्रमणसँगै स्थानीय उत्पादन र संस्कृति अनुभव गर्न चाहनेका लागि राना थारु होमस्टे अब प्रमुख आकर्षण बनेको उनले बताए ।
