कार्तिक १० धनगढी । कैलालीमा संघीय सरकारले फागुन २१ गतेका लागि घोषणा गरेको प्रतिनिधि सभाको निर्वाचनको तयारीका कामहरु तिब्रगतीमा भई रहेका छन । कैलालीमा नयाँ मतदाता नामावली दर्ता गर्ने, मतदाता नामावली सार्ने, मतदाता नामावली सच्याउने, मतदान केन्द्रको अनुगमन गर्ने, निर्वाचन सामग्री अद्यावधि गर्ने लगायतका कामहरु तिब्रगतीमा भइरहेका हुन ।
निमित्त प्रदेश निर्वाचन कार्यालय, धनगढीका प्रमुख प्रेम भट्टले कार्यालयमा हाल मतदाता नामावली दर्ता र अद्यावधिको काम भइरहेको बताउदै कैलालीमा रहेका २ सय ३७ वटा मतदान स्थलको अनुगमन गर्ने काम पनि सँगसँगै भइरहेको जानकारी गराए ।
मतदान स्थलको अनुगमन गरिहरेको बताउदै उनले हालसम्म गौरीगंगा, गोदावरी, घोडाघोडी, लम्की चुहा, टीकापुरका धेरै मतदान स्थलको अवलोकन गरिसकेको बताए ।
पुराना मतपेटिकालाई पनि एक चरणको अद्यावधिक राख्ने काम गरिएको बताउदै उनले उनले कार्तिक ३० गते सम्म कार्यालयमा मतदाता नामावली दर्ताको काम भइरहेकाले अहिले त्यसमा बढी जोड दिइएको बताए ।
कैलालीमा असोज १० गतेदेखि मतदाता नामावलीमा नाम दर्ताको प्रक्रिया सुरु भएको थियो । आइतबार दिउँसो सम्म जिल्ला भित्र र बाहिरका गरेर १ हजार २ सय ६९ जनाले मतदाता नामावलीमा नाम गर्दा गराएको निर्वाचन कार्यालयले जनाएको छ । कार्यालयका अनुसार जिल्ला भित्रका मात्रै १ हजार ४७ जना रहेका छन् भने ती मध्ये ६ सय ५८ जना पुरुष र ३ सय ८९ जना महिला रहेका छन् ।
त्यसैगरी जिल्ला बाहिरका २ सय २२ जनाले कैलालीबाट मतदाता नामावलीमा नाम दर्ता गराएका छन् । जसमा १ सय ६१ जना पुरुष र ६१ जना महिला रहेका छन् । निर्वाचन आयोगले हाल आफू बसेकै जिल्लाबाट मतदाता नामावलीमा नाम दर्ता गर्न पाउने व्यवस्था गरेको छ ।
निर्वाचन आयोगले बिहान ८ बजेदेखि साँझ ६ बजेसम्म मतदाता नामावलीमा नाम दर्ता, बायोमेट्रिक तथा ठाउँ सच्याउने काम गर्दै आएको छ । कात्तिक ३१ गतेसम्म निर्वाचन आयोगले नाम दर्ताको काम गर्ने जनाएको छ । कैलालीमा ७ हजारसम्म नयाँ मतदाता थप हुन सक्ने अनुमान गरिएको छ ।
कैलालीमा २०७८ को जनगणना अनुसार ९ लाख ११ हजार १ सय ५५ जनसङ्ख्या रहेकोमा ५ लाख ३७ हजार मतदाता रहेका थिए । २०८१ चैत मसान्त सम्म कैलालीमा १८ वर्ष उमेर पुगेकाहरूको जनसङ्ख्या भने ५ लाख ३५ हजार ३ सय ४४ रहेको छ ।
कैलालीमा प्रतिनिधि सभा निर्वाचनका लागि ५ निर्वाचन क्षेत्र तोकिएका छन् । जसमा कैलाली क्षेत्र नम्बर १ मा १ लाख ६ हजार ७ सय ३, क्षेत्र नम्बर २ मा १ लाख ४ हजार ९ सय ६, क्षेत्र नम्बर ३ मा १ लाख ७ हजार ६ सय ५९, क्षेत्र नम्बर ४ मा १ लाख १० हजार ४ सय ५३ र क्षेत्र नम्बर ५ मा १ लाख ५ हजार ७ सय ९३ मतदाता रहेको प्रदेश निर्वाचन कार्यालय धनगढीले जनाएको छ । कैलालीमा ५ निर्वाचन क्षेत्र, २ सय ३७ मतदान स्थल र ६ सय २९ मतदान केन्द्र तोकिएका छन् ।
