असोज २४ धनगढी । कैलाली जनपुस्तकालयका चार जना सदस्यले राजीनामा दिएका छन् । भदौ २८ गते भएको निर्वाचनमा निर्वाचित भएका चार जनाले चुनाव भएको एक महिना नपुग्दै राजीनामा दिएका हुन् ।
कार्यसमिति सदस्य पदमा निर्वाचित जयराज जोशी, शेरसिंह खड्का, टिआर पाठक र सुशीला भट्टले राजीनामा दिएका हुन् । चारै जनाले असोज २२ गते राजीनामा लेखेर बुझाएको जयराज जोशीले बताए ।
भदौ २८ गते भएको निर्वाचनमा अध्यक्षमा दुई जना उम्मेदवार तयार भएको बताउदै उनले अहिलेका अध्यक्ष शिवराज ओझालाई सर्वसम्मत बनाउन भूमिका खेले पनि आफूहरूलाई सदस्य पदको चुनावमा चारै जनालाई पराजीत गर्न अध्यक्ष ओझाले चलखेल गरेको जयराज जोशीले गुनासो गरेका छन् ।
अध्यक्ष ओझाको चलखेल असफल पार्दै बहुमतले आफूहरू विजयी भए पनि पदाधिकारी चयनमा ओझाले आफुसँग बहुमत रहेको भन्दै पेल्ने काम गरेको जोशीले बताए । शिवराज ओझालाई सर्वसम्मत अध्यक्ष हुन सहयोग गरेको बताउदै उनले उल्टै कार्यसमितिमा आउन नदिन चलखेल गरेको बताए ।
सदस्यहरूबाटै उपाध्यक्ष र सचिव लगायतका पदाधिकारी चयन गर्दा एकलौटी र मनोमानी गरेको जोशीले बताए । अध्यक्ष ओझाको धम्किपूर्ण व्यवहार र रबैया देखेर चार जनाले सामूहिक राजीनामा दिएका उनले बताए । चार जना सदस्यले आधा दर्जन आरोप लगाउँदै राजीनामा पत्र लेखेका छन् ।
उनीहरूले अध्यक्षले धम्किपूर्ण भाषामा निर्देशन दिएको, आजीवन सदस्यहरूलाई नीतिगत छलफलमा नबोलाएको, लेखापरीक्षण नगराएरै चुनावी साधारण सभा गराएको, निर्वाचन प्रक्रियामा आर्थिक अपारदर्शिता भएको, मुख्य निर्णय पुस्तिकामा नभइ अर्को पुस्तिका प्रयोग गर्ने गरेको र उपाध्यक्ष, कोषाध्यक्ष, सचिव र सह–सचिव मनोनयन गर्दा आफ्ना ’यस म्यानहरू’ लाई छनौट गरेको जयराज जोशी लगायत चार जना सदस्यले आरोप लगाएका छन ।
अध्यक्ष ओझाले आफुसँग बहुमत सदस्य भएको भन्दै मनपरी गर्न थालेकाले कार्यसमितिमा बस्न उपयुक्त नठानेर राजीनामा दिएको जोशीले बताए । नव निर्वाचित अध्यक्ष शिवराज ओझाले भने उनीहरुलाई आफूले खेद्नुपर्ने कुनै कारण नभएको बताएका छन ।
सर्वसम्मत पदाधिकारी चयन भएको र आफूले चलखेल नगरेको उनले बताएका छन् । ओझाले निराधार आरोप लगाएर राजीनामा लेखेको सुनेको बताउदै पत्र भने हेर्न नपाएको बताएका छन् ।
