असोज २३ धनगढी । थारू समुदायको मुङ्ग्रहवा नाच लोप हुने खतरा बढेको छ । लोपोन्मुख नाच संरक्षणको प्रयास राज्यस्तरबाटै नभए पछि थारू समुदायको मुङ्ग्रहवा नाच लोप हुने खतरा बढेको हो । विगतमा दशैँ, दीपावलीताका विभिन्न गाउँमा नाचिँदै आएको यो नाच पछिल्लो समय मुस्किलले देख्न पाइने गरेको छ ।
पहिले मुङ्ग्रहवा नाच गरेका पुस्ता अहिले बुढेसकालमा पुगिसकेका छन् । पिठ्युँपछाडि मयूरको प्वाँख बाँधी काठको मुङ्ग्रो लिएर देखाउने नाच नयाँ पुस्तामा पुस्तान्तरण हुन सकेको छैन । मुङ्ग्रहवा नाच संरक्षण प्रति राज्यको ध्यान नगएकाले यो नाच लोप हुने खतरा बढ्दै गएको कैलारी गाउँपालिका वडा नम्बर–६, खरुवाखेराका मुङ्ग्रहवा नाचका अगुवा मन्दरिया भागिराम चौधरीले बताए ।
संरक्षणका लागि आफ्नोतर्फबाट धेरै कोसिस गर्दै आएको बताउदै उनले राज्यले चासो नदिएका कारण निराश बन्नु परेको बताए । एकदिन यो नाच लोप हुने चिन्ता बढेको उनले बताए । कैलालीमा मुङ्ग्रहवा नाच खरुवाखेराको भागिरामको टिमले मात्रै नियमित रूपमा देखाउँदै आएको उनले बताए ।
चौधरी सहित उनँका सहपाठीले २०४२ साल देखि यो नाच देखाउँदै आएका भए पनि राज्यबाट हौसला थप्ने काम नभए पछि निराशा छाएको उनले बताए । मुङ्ग्रहवा नाच पुरुष र महिला दुवै मिलेर नाच्ने गरेको उनले बताए ।
पछाडि नाचिने महिलालाई द्रौपदी भन्ने गरिएको उनले बताए । विगतमा द्रौपदीको भूमिका पनि पुरुषले नै महिलाको वेशभूषा लगाएर निर्वाह गर्ने गरेको बताउदै उनले अचेल यो भूमिकामा महिला नै रहने गरेको बताए ।
कैलारी गाउँपालिका वडा नम्बर–६ का कुलराज चौधरीले थारू समुदायको आकर्षक नाच लोपको सँघारमा पुग्नु चिन्ताको विषय भएको बताए । यो नृत्य संरक्षणका लागि सबै जुर्मुराउन आवश्यक रहेको उनले बताए ।
