असोज ०३ धनगढी । चाडपर्वलाई लक्षित गरी सरकारी स्वामित्वको साल्ट ट्रेडिङ कार्पोरेशन लिमिटेडले कैलालीको अत्तरियामा सञ्चालन गरिएको सुपथ मूल्य पसलमा ग्राहक आएका छैनन । साल्ट ट्रेडिङले भदौ ३० गते देखि अत्तरियामा सुपथ मूल्य पसल सञ्चालन गरेको भए पनि ग्राहक भने नआएका हुन । बजार मूल्य भन्दा २ देखि ७ रुपैयाँ सम्म सस्तोमा सामान बिक्री गरिरहेको सुपथ मूल्य पसलमा ग्राहक भने आउन सकेका छैनन ।

अत्तरियामा सुपथ मूल्य पसल सञ्चालन गरेको ४ दिन बितिसक्दा पनि १५ जना मात्रै ग्राहक किनमेलका लागि पुगेको बताईएको छ । विगत ५ वर्ष देखि अत्तरीयामा सञ्चालनमा रहेको साल्ट ट्रेडिङको डिपोले खाद्य व्यवस्था तथा व्यापार कम्पनी लिमिटेड प्रादेशिक कार्यालय सँगको सहकार्यमा चाडपर्व लक्षित सुपथ मूल्य पसल सञ्चालन गर्दै आएको छ ।

अत्तरियाको धनगढी रोडमा भाडाको घरमा सञ्चालनमा रहेको डिपोमा हाल ५ जना कर्मचारी कार्यरत रहेका छन् । साल्ट ट्रेडिङ कर्पोरेसन लिमिटेड प्रादेशिक कार्यालय धनगढीका प्रमुख तेज बहादुर कुँवरले ३० गते देखि मात्रै सुपथ मूल्य पसल सुरु गरिएकाले बिस्तारै ग्राहक बढ्दै जाने बताए । उनले छठ सम्म सुपथ मूल्य पसल सञ्चालनमा रहने बताए ।

चिनी बजार मूल्य भन्दा ५ र दाल चामल तेल लगायतका सामान बजार मूल्य भन्दा ७ रुपैयाँ सस्तो पाइने बताउदै उनले चिनीमा ५ रुपैयाँ छुट गरेर ९५ रुपैयाँ कायम गरिएको बताए । त्यसैगरी नुनमा पनि २ रुपैयाँ छुट गरेर २४ रुपैयाँ तोकिएको बताउदै उनले २५ केजीको जिरा मसिनो चामलमा २५ रुपैयाँ छुट गरेर २ हजार २५ रुपैया कायम गरिएको बताए ।

भुजा २ सय ग्रामको प्याकेटमा २ रुपैयाँ छुट गरेर २० रुपैयाँ, टाइचिन चिउरा १ केजीको प्याकेट १ सय १५ पर्ने गरेकोमा ७ रुपैयाँ छुट दिएर १ सय ८ रुपैया कायम गरिएको उनले बताए । सबै दालहरूमा ७÷७ रुपैयाँ छुट गरिएको बताउदै उनले छुट गरिएको मूल्य अनुसार मासको दाल १ सय ६०, मुसुरोको दाल १ सय ३५,अरहरको दाल १ सय ८५, मुङको दाल १ सय ८०, बोडी १ सय ६० र चना १ सय ३५ पर्ने जानकारी गराए ।

त्यसैगरी तेल र पिठोमा पनि प्रति लिटर, प्रति केजी ७ रुपैयाँ छुट गरिएको बताउदै कुवरले छुट मूल्य अनुसार सनफलावर तेल आधा लिटर १ सय २०, उत्सव तोरीको तेल आधा लिटर १ सय ३० र शान्ति तोरी तेल एक लिटरको ३ सय ५५ लिटर कायम गरिएको बताए । त्यसैगरी छुट मूल्य अनुसार मैदा २ केजीको १ सय ४०, सुजी ५ सय ग्रामको ५० रुपैया कायम गरिएको उनले बताए ।

चाडपर्वलाई लक्षित गर्दै साल्ट ट्रेडिङ कर्पोरेसन र खाद्य व्यवस्था तथा व्यापार कम्पनी लिमिटेड प्रादेशिक कार्यालय मार्फत भदौ ३० गते देखि सुदूरपश्चिममा ३६ वटा सुपथ मूल्य पसल सञ्चालन गरिएका छन । जसमा साल्ट ट्रेडिङ मार्फत ८ वटा र खाद्य मार्फत २८ वटा सञ्चालन गरिएका छन् ।

साल्ट ट्रेडिङले कैलालीको धनगढी, अत्तरिया र टीकापुर, कञ्चनपुरको महेन्द्रनगर र बेलौरी तथा डोटीको दिपायल, डडेल्धुराको सदरमुकाम तुफानडाँडा र बैतडीको पाटनमा सुपथ मूल्य पसल सञ्चालन गरेको छ ।

त्यसैगरी खाद्यले कैलालीको धनगढी, डडेल्धुराको खलंगा, बाजुराको मार्तडी, कोल्टी, धुलीचौर, बिच्छ्याँ, पाण्डुसैन, बझाङको सदरमुकाम, दौलिचौर, थलरा, भातेखोला र तलकोट तथा डोटीको जिल्ला सदरमुकाम र मौवामा सुपथ मूल्य पसल सञ्चालन गरेको छ ।

त्यसैगरी बैतडीको गोठालापानी, पुर्चाैडी हाट, रौलेश्वर, आम्चौर र दोगडाकेदार, दार्चुलाको सदरमुकाम, सुनसेरा, हिकिला र खण्डेश्वरी, कञ्चनपुरको महेन्द्रनगर, अछामको मंगलसेन, सैनाबजार, साँफेबगर र कमलबजारमा सुपथ मूल्य सञ्चालन गरिएको छ ।

सुपथ मूल्य पसलमा निश्चित कोटा अनुसार मात्रै सामान खरिद गर्न पाइने बताइएको छ । नुन प्रति व्यक्ति ५ केजी, चिनी ६ केजी सम्म मात्रै खरिद गर्न पाइने बताईउको छ । सरकारले आम उपभोक्ताको हितलाई ध्यानमा राखेर अत्यावश्यक खाद्य तथा उपभोग्य वस्तु सहुलियत मूल्यमा उपलब्ध गराउन चाडपर्वको अवधिभर सुपथ मूल्य पसल सञ्चालन गर्दै आएको छ ।