भदौ १० धनगढी । कैलालीको स्याउलेमा सुदूरपश्चिम गौरा पर्व मेला आयोजना गरिने भएको छ । गोदावरी नगरपालिका वडा नम्बर–८ स्याउलेमा रहेको विश्वनाथ महादेव मन्दिरमा गौरा पर्व मेला आयोजना गरिने भएको हो ।
मन्दिर व्यवस्थापन समितिको आयोजनामा हुने मेला भाद्र १६ देखि २१ गते सम्म सञ्चालन हुने आयोजकले आइतबार पत्रकार सम्मेलनको आयोजना गरी जानकारी गराएको हो । मेला संयोजक लक्ष्मी विनाडीले कला संस्कृतिको संरक्षण र सम्वद्धन गर्न मेलाको आयोजना गर्न लागिएको बताइन् ।
उनले मेलामा गौरा प्रस्तुतिसँगै रमाइलो मेला पनि आयोजना गरिने बताइन् । मेलामा राष्ट्रिय तथा स्थानीय कलाकारद्वारा साङ्गीतिक एवम् देउडा प्रस्तुतिसँगै झाँकी प्रदर्शनी गरिने उनले बताइन् ।
उनले मेलामा भाद्र १७ गते सावित्री धामी, उज्ज्वल सिंह साउँद, १८ गते ममता धामी, कृष्ण धामी, १९ गते टिका सानु, दीपक रिमाल, २० गते पदम जोशी, तुलसी बुढा आउने जानकारी गराईन । मेलाको पहिलो दिन र अन्तिम दिन भने स्थानीय कलाकारलाई बोलाइने उनले बताईन ।
कुम्भराज भट्ट, कलसी विक लगायतका कलाकारको प्रस्तुति रहने उनले बताईन । मेलामा सबै जातजाति, भेसभुसा समेटिने बताउदै उनले मेलामा दैनिक उपभोग्य बस्तु तथा सेवाको प्रदर्शनी तथा खरिद विक्री पनि गरिने जानकारी गराईन ।
गौरा पर्व सुदूरपश्चिमको मौलिक पर्व भएको बताउदै उनले विगत १५÷१६ वर्ष देखि यसको संरक्षण गर्न लागी रहेको बताईन । मन्दिर बनाए देखि मन्दिरको संरक्षण गर्दै गौराको अवसरमा गौरा पर्व मेलाको आयोजना गर्दै आएको उनले जानकारी गराईन ।
