जेठ ३१ काठ्माण्डौँ । अहमदाबाद विमान दुर्घटनामा मृत्यु भएकाको संख्या २ सय ७५ पुगेको भारतीय सञ्चारमाध्यमले जनाएका छन् । हालसम्म अस्पतालमा २ सय ७० भन्दा बढी शवको पोस्टमार्टम गरिएको छ । अन्यको डीएनए नमुना लिने प्रक्रिया जारी छ । दुर्घटनामा मृत्यु हुनेको संख्या २ सय ७५ पुगेको छ । दुर्घटनास्थलमा भग्नावशेष हटाउने काम अझै जारी छ ।
गत बिहीबार दुर्घटनामा परेको एयर इन्डियाको विमानमा चालक दलका सदस्य र यात्रु सहित २ सय ४२ जना थिए, जसमध्ये एक यात्रु बाँचे । यसबाहेक विमान खसेको बीजे मेडिकल कलेज होस्टेलमा रहेका डाक्टर तथा कर्मचारी गरी ३४ जनाको पनि मृत्यु भएको हो ।
एयर इन्डियाको बोइङ ७८७–८ ड्रिमलाइनर विमान यही जुन १२ तारिख (जेठ २९) दिउँसो १ः३८ बजे अहमदाबाद विमानस्थलको रनवे २३ बाट लन्डनका लागि उड्नासाथ घना बस्ती भएको क्षेत्रमा खसेको थियो ।
प्रत्यक्षदर्शीहरूका अनुसार, विमान केही सेकेन्डमै असन्तुलित भयो र विमानस्थलको सीमा बाहिर भवनमाथि खस्यो । दुर्घटना भएको केही समयपछि आगो लाग्यो र विमानका बाहिरका मानिस पनि मरे । विमान दुर्घटनाबारे भारत सरकारले औपचारिक अनुसन्धान सुरु गरिसकिएको जनाएको छ ।
