चैत्र १९ धनगढी । कैलालीका आर्यन विश्वकर्माले ‘मेडिकल ड्रोन बनाएका छन् । एक वर्षअघि नमुना जहाज उडाएर चर्चा पाएका आर्यनले मेडिकल ड्रोन बनाएका हुन । लम्कीचुहा नगरपालिका वडा नम्बर–९, प्रतापपुर भुर्राघाटका आर्यनले प्रत्यक्ष हवाईजहाज नदेखि इन्टरनेटको माध्यमबाट हवाईजहाजको बारेमा जानकारी बटुलेर हुबहु रिर्मोट कन्ट्रोलबाट चल्ने नमुना हवाईजहाज बनाएर उडाएको समाचार प्रकाशन भएपछि उनलाई धनगढीस्थित चैतन्य पाठशालाले छात्रवृत्तिमा पढाइ रहेको छ ।
उक्त विद्यालयमा कक्षा ९ को परीक्षा दिएर बसेका १५ वर्षीय आर्यनले मेडिकल ड्रोन बनाउन विद्यालयले सहयोग गरेको बताए । उनले आफूले बनाएको ड्रोनले दुई किलो सम्मको मेडिकल सामग्री बोकेर एक ठाउँबाट अर्को ठाउँमा पु¥याउने जानकारी गराए । कुनै बिरामी औषधी, इन्जेक्सन नपाएर छट्पटिइरहेको अवस्थामा ड्रोनले बिरामीसम्म पु¥याउन मद्दत गर्ने उनलदे बताए ।
आकस्मिक सेवाका लागि ड्रोनको माध्यमबाट मेडिकल सामग्री पठाउन सकिने बताउदै आर्यनले आफूले बनाएको ड्रोनले कुनै औपचारिक कार्यक्रममा आकाशमा झन्डा फहराउने तथा पुष्प वर्षा गराउनका लागि प्रयोग गर्न सकिने समेत जानकारी गराए । हालै धनगढीमा भएको धार्मिक कार्यक्रमको उद्घाटनमो ड्रोनबाट पुष्प वर्षा गरिएको विद्यालयले जनाएको छ ।
कैलालीको प्रतापपुरमा रहेको सरस्वती माध्यमिक विद्यालयमा कक्षा ८ सम्म अध्ययन गरेका आर्यन अभाव र दुःखमा हुर्कदै गरेका बालक हुन् । उनी चार वर्षको हुँदा भारतमा रोजगारीका लागि गएका बुवा भरत विश्वकर्माको करेन्ट लागेर उतै निधन भएको थियो । पतिको निधन पछि आर्यन र दुई छोरीको लालनपालन देखि सबै जिम्मेवारी आमा राजेश्वरी विश्वकर्माको काँधमा आएको थियो ।
आर्थिक अभावकै कारण गाउँमै खुम्चिएका आर्यनको अद्भूत क्षमताको चर्चा भए पछि धनगढीस्थित चैतन्य पाठशालाले निःशुल्क अध्ययनका लागि गत वर्ष धनगढी लगेको आर्यनका काका नृप विश्वकर्माले जानकारी गराए । महावीर पुनबाट प्रभावित आर्यनले भविष्यमा वैज्ञानिक बन्ने सपना सुनाए ।
साँच्चिकै हवाईजहाज बनाएर आमा, अङ्कल, दिदीहरूलाई त्यसैमा बसाएर उडाउने सपना भएको उनले बताए । चैतन्य पाठशाला धनगढीका सञ्चालक गणेशप्रसाद जोशीले आर्यन विश्वकर्माको ९ कक्षा देखि १२ कक्षा पढाउने जिम्मा विद्यालयले लिएको जानकारी गराए । आर्यनको एक वर्षको पढाइ, बसाइका लागि वर्षको पाँच लाख रुपैयाँ खर्च विद्यालयले बेहोर्ने गरेर जिम्मा लिएको उनले बताए ।
विश्वकर्मा अनुशासित लगनशील भएको बताउदै जोशीले एआईको प्रयोगबाट आर्यनले ड्रोन बनाएको बताए । उनलाई सिक्नका लागि चाहिने सबै कुरा विद्यालयले व्यवस्था गरेको उनले बताए । आर्यनले बनाएको ड्रोन रिर्मोट कन्ट्रोलबाट चल्ने भएकाले यसको व्यावहारिक प्रयोगमा ल्याउनका लागि अझै धेरै अध्ययन र प्रयोगको आवश्यकता रहेको सञ्चालक जोशीले बताए ।
सञ्चालक जोशीले आफ्नो विद्यालयमा आए पछि आर्यनले आरसी प्लेन लगायत सेन्सरबाट चल्ने अन्य सामग्री समेत बनाएको जानकारी गराए । उनले आर्यनका कारण विज्ञान र अनुसन्धानका लागि विभिन्न इनोभेसन (खोज) मा विद्यार्थीलाई सहयोग पुगेको जानकारी गराए ।
