माघ २६ धनगढी । क्याप्टेन वेद उप्रेतीको नयाँ कृति ‘पायलट प्रेम’ को शनिबार धनगढीमा विमोचन गरिएको छ । सुदूरपश्चिम विश्वविद्यालयका डिन प्रेमराज पन्त, सुदूरपश्चिम विश्वविद्यालयका पूर्व रजिस्ट्रार हेमराज पन्त, लेखकका आमा सरस्वती उप्रेती लगायतले संयुक्त रुपमा उपन्यासको विमोचन गरेका हुन ।
क्याप्टेन उप्रेतीले आफ्नो १३ औं कृतिको रुपमा पायलट प्रेम उपन्यास लेखेका हुन । उपन्यास भित्र पाइलटको चुनौतीपूर्ण जीवन, उतारचढाव, रोमान्सका कुराहरु समेटिएको क्याप्टेन उप्रेतीले बताए । उपन्यास भित्र ९० प्रतिशत वास्तविक कथा समेटिएको उनले जानकारी गराए ।
त्यसैगरी, १० प्रतिशत काल्पनिक कुरा राखिएको उनले बताए । पुस्तकमाथि समीक्षा गर्दै कैलाली बहुमुखी क्याम्पसका प्राध्यापक सीताराम भट्टले उपन्यासको बाहिर पायलट प्रेम भनिए पनि भित्र जीवनवादी र आशावादी उपन्यास रहेको बताए ।
उनले उपन्यास भित्र विभिन्न किसिमका प्रेमको व्याख्या गरिएको बताउदै प्रेममा बे्रकअप भएमा निराश हुन नहुने सन्देश उपन्यासले दिएको बताए । अर्का टिप्पणीकर्ता कलमराज जोशीले लेखक क्याप्टेन उप्रेतीले जहाजको उडान मात्रै नभएर शब्दको उडान पनि उपन्यासमा भरेको बताए ।
