मंसिर ३० कञ्चनपुर । बेलौरी नगरपालिका वडा नम्बर–४ शान्तिपुरस्थित उखुबारीमा फेला परेको बर्मी जातको वयस्क अजिङ्गरको उद्धार गरिएको छ ।
कुण्डा सबडिभिजन वन कार्यालयका प्रमुख दिनेशकुमार यादवले १३ फिट लम्बाइ र ३१ दशमलव पाँच सय ८० किलोग्राम तौलको अजिङ्गरको उद्धार गरिएको जानकारी गराए । उखु काट्ने क्रममा किसानले अजिङ्गर देखेको बताउदै उनले वन सुरक्षाकर्मी, स्थानीय बासिन्दाको सहयोगमा अजिङ्गरको उद्धारगरिएको बताए ।
उनले नगरपालिकाको वडा नम्बर–५ र ७ मा पर्ने अमर स्मृति सामुदायिक वन क्षेत्रको सीमसार क्षेत्रमा अजिङ्गरलाई छाडिएको यादवले जानकारी गराए । यो प्रजातिका अजिङ्गरले चरादेखि सुँगुर र मृग जस्ता ठूला स्तनधारी जनावरहरूलाई समेत आहारा बनाउने उनले जानकारी गराए ।
यस्ता अजिङ्गरले सुक्खा जङ्गल, पहाड, खुला घाँसे मैदान र खेतबारीमा बासस्थान बनाउँने बताउदै उनले यस प्रजातिका अजिङ्गरको आयु २० वर्षभन्दा बढी हुने बताए । समुन्द्री सतह देखि एक सय मिटर देखि दुई हजार पाँच सय मिटर उचाइ सम्म यस प्रजातिका अजिङ्गर पाइने उनले जानकारी गराए ।
