साउन ३१ कञ्चनपुर । दैजी–छेला औद्योगिक क्षेत्रमा पर्ने रूखको लगत संकलन गर्ने कार्य सुरु गरिएको छ । बेदकोट नगरपालिका वडा नम्बर–२ र ३ मा पर्ने औद्योगिक क्षेत्रको स्वीकृत वातावरणीय प्रभाव मूल्याङकन अनुसार लगतमा समावेश हुनबाट छुटेका सामुदायिक वनभित्रका रूखहरुको लगत संकलनको कार्य सुरु गरिएको हो ।
डिभिजन वन कार्यालय कञ्चनपुरका डिभिजनल अधिकृत भीमप्रसाद कँडेलले रूखहरुको लगत संकलनको कार्य सुरु गरिएको जानकारी गराए । औद्योगिक क्षेत्रका पूर्व, उत्तर र दक्षिणी क्षेत्र अन्तर्गत पर्ने जनचेतना सामुदायिक वन र बेदकोट सामुदायिक वन क्षेत्रमा रूख तथा खम्बाको लगत लिने कार्य यसअघि गरिएको थियो ।
स्वीकृत वातावरणीय प्रभाव मूल्याङकनमा छुटेको पश्चिमतर्फको क्षेत्रका रूखको लगत लिने कार्य अहिले भइरहेको डिभिजन वन कार्यालयका डिभिजनल अधिकृत भीमप्रसाद कँडेलले जानकारी गराए । औद्योगिक क्षेत्रभित्र पर्ने दुई सय ४० दशमलव ३४ हेक्टर जग्गामा रहेका रूखको लगत लिनु पर्नेमा हालसम्म दुई सय चार दशमलव ५२ हेक्टर जग्गामा रहेका रूखहरुको लगत लिने कार्य गरिएको उनले बताए ।
बाँकी ३५ दशमलव ८२ हेक्टर क्षेत्रफल जग्गामा रहेका रूखहरुको लगत लिने कार्य सुरु गरिएको उनले जानकारी गराए । यसअघि औद्योगिक क्षेत्रभित्र पर्ने जनचेतना सामुदायिक वनमा १९ हजार आठ सय दुई र बेदकोट सामुदायिक वनमा पर्ने २३ हजार चार सय ५५ गरी ४३ हजार दुई सय ५७ वटा रूखको लगत लिने कार्य गरिएको अधिकृत कँडेलले जानकारी गराए ।
रूखको लगत लिनका लागि डिभिजन वन कार्यालयका कर्मचारी औद्योगिक क्षेत्र व्यवस्थापन लिमिटेडका प्राविधिक कर्मचारी खटिएको उनले बताए । लगत सङकलन गर्ने कार्य दुई हप्ताभित्र सक्ने लक्ष्य लिइएको उनले जानकारी गराए । चुरे क्षेत्रको वन्यजन्तु ओहोरदोहोर गर्ने झण्डै १९ हेक्टर क्षेत्रलाई घटाएर बाँकी स्वीकृत गरिएको उनले जानकारी गराए ।
रूखको लगत लिने कार्य पूरा गरी मन्त्रालयमा पठाउने उनले जानकारी गराए । मन्त्रिपरिषद्को निर्णय अनुसार रूख छपान, कटान कार्यको आदेश बमोजिम अरू कार्य त्यसपछि अगाडि बढने जानकारी गराउदै उनले अहिले लगत लिने कार्य मात्रै भइरहेको जानकारी गराए ।
