साउन २४ कञ्चनपुर ।शुक्लाफाँटा नगरपालिका वडा नम्बर ६ कसरौलका ८० बषीय बन्धु रानाले परम्परागत सीपको सदुपयोग गर्दै डोरी बाटेर बिक्री गरी परिवारको गुजारा चलाउदै आएका छन । डोरी बाटेरै महिनामा तीस हजार बढी आम्दानी गर्दै आएको उनले त्यहीबाट गुजारा चलाउदै आएका हुन । बजारमा सिमेन्ट राख्न प्रयोग भएका खालि बोरीहरु खरिद गरी त्यसको धागो निकालेर त्यसबाट डोरी बाटने गरेको उनले बताए ।

डोरी बलियो र देख्नमा आकर्षक हुने भएकाले ग्राहकले सहजै किन्ने गरेको बताउदै उनले एउटै डोरी दुई सय देखि पाँच सय सम्ममा बिक्री हुने गरेको बताए । घरमै बसेर डोरी तयार गर्ने गरेको बताउदै उनले तयार भएको डोरी काँधमा बोक्दै गाउँ गाउँ पुरयाएर बिक्री गर्दै आएको बताए ।

दैनिक एक हजार जतिको डोरी बिक्री हुने गरेको बताउदै उनले डोरी बेच्नकै लागि विहानको खाना खाएर गाउँ चहार्दै हिडने र बेलुकी साँझ अवेर मात्रै घर फर्कने गरेको सुनाए । रानाले छडकी, वरहा, घाँस बोक्ने जाल, मुखडा, नाथ लगायत बनाउने गरेको बताउदै सबै भन्दा बढी छडकी डोरी बिक्री हुने गरेको बताए ।

गाई गोरु बाध्नका लागि प्रयोग हुने छडकीको ग्राहकले बढी माग गर्ने गरेको बताउदै रानाले डोरी बनाउन २० वर्षको उमेरमै सिकेको बताए । “धेरै परिवार हुँदा आर्थिक अभाव सधैं भैरहने बताउदै उनले लेखपढ गर्ने अवसर नपाएको बताए । लेखपढ पर्ने खासै चासो पनि नभएको बताउदै उनले गोठालो जाने गरेको सुनाए ।

अरुले डोरी बनाएको देखेर त्यसबाटै सिकेको बताउदै उनले पहिला बावियो, सनपाट, जुटको डोरीको प्रयोग बढी हुने गरेको बताए । खेतवारीमै डोरीका लागि जुट, सनपाटको खेती किसानले प्रशस्त रुपमा गर्ने गरेको बताउदै उनले बजारमा प्लाष्टिका डोरी आए पछि किसानले जुट र सनपाटको खेती गर्न छाडेको बताए ।

जुट र सनपाटको खेती हुन छाडेपछि विकल्पमा प्लाष्टिका बोरीहरु खरिद गरी त्यसबाटै डोरी बनाउने कार्य थालेको उनले बताए । ४० वर्षको उमेर पछि व्यवसायीक रुपमा डोरी बनाएर बिक्री गर्ने गर्न थालेको बताए । विवाह गरेको दुई वर्षमै श्रीमतीको देहवसान भए पछि दोश्रो विवाह नगरेका रानाले जेठो दाजुको घरमा बस्दै आएको बताए ।

डोरी बेचेकै पैसाले रानाले जेठो दाजुको छोराका लागि मोटरसाइकल खरिद गरिदिएको बताए । उनका नाती डुठ्ठा रानाले मोटरसाइकल किन्न थोरै रकम आफैले जुटाएको बताउदै दुई लाख रकम डोरी बेचेर आएको रकम बाजेले दिएको बताए ।

उमेर छदा डोरी बेचेर महिनामै ५०÷६० हजार सम्म पनि कमाउने गरेको बताउदै उनले उमेर ढल्कीदै जाँदा कमाइ पनि घटेको बताए । घर खर्चसंगै आफुलाई आवश्यक भएको लुगाफाटो,जुत्ता,चप्पल, औषधपचार लगायतको खर्च डोरी बेचेर आएको रकमबाटै व्यहोर्दै आएको उनले सुनाए ।

पूर्व वडा अध्यक्ष जगता रानाले पौरख गरेर खाने स्वावलम्बी व्यक्तिका रुपमा आफुले बन्धुलाई चिनेको बताए । व्यवसायीक कार्यलाई निरन्तरता दिए पैसाका लागि अरुकोे मुख ताक्नु नपर्ने पाठ उनीबाट सिक्नु पर्ने उनले बताए ।