जेठ २७ धनगढी । दलित समुदायले गर्दै आएको परम्परागत सीप आरन पेशाबाट कैलालीका दलित समुदायले राम्रो आम्दानी गर्न थालेका छन् । विभिन्न कारणले आरन व्यवसायी घट्दै गएको अबश्थामा आरन पेशा गरीरहेका दलित समुदायले राम्रो आम्दानी गर्न थालेका हुन् । कैलालीको धनगढी उप–महानगरपालिका वडा नम्बर–११ बेलाका खेमबहादुर विकले घरायसी प्रयोजनका कृषी औजार मर्मत गरेर दिनमा एक हजार पाँच सय देखि दुई हजार सम्म आम्दानी गर्ने गरेको बताए । कुनै दिन तीन हजार सम्म पनि आम्दानी हुने गरेको बताउदै उनले नयाँ सामान बनाउनसके झनै राम्रै कमाइ हुने बताए ।
पुराना सामाग्री मर्मत गरेर पनि दैनिक एक हजार पाँच सयसम्म बचत हुने गरेको उनले बताए । खेतीपाती गर्न जग्गा जमिन केही नभएको बताउदै उनले अन्य रोजगारी पनि नभएको बताए । सात जनाको परिवार भएको बताउदै उनले छोराछोरीको लालनपालन, पढाइलेखाइ खर्च यसैबाट चलाएको बताए । नयाँ बनाएको बञ्चरोलाई तीन हजार सम्म, हँसियालाई पाँच सयदेखि एक हजार पाँच सय सम्ममा बिक्री गर्ने गरेको विकले बताए । कृषि तथा घरायसी प्रयोजनका सबै सामान बनाउने सीप भएका ४० वर्षीय विकले आधुनिक औजारको प्रयोग गरेर काम गर्न पाए मनग्य आम्दानी गर्न सकिने बताए ।
त्यसैगरी गोदावरी नगरपालिका वडा नम्बर–८ स्याउले बजारका शेरबहादुर तिरुवाले पनि आरन व्यवसायबाट राम्रै आम्दानी हुने गरेको बताए । उनले दैनिक एक हजार पाँच सय देखि दुई हजार सम्म कमाउने गरेको बताए । कुनै दिन तीन हजारसम्म पनि कमाइ हुने गरेको बताउदै उनले खर्च कटाएर दैनिक एक हजार पाँच सयसम्म बचत हने गरेको बताए । उनले सम्पूर्ण घर खर्च यसै आरन पेसाबाट चलाएको बताए । उमेरले ५० वर्षीय तिरुवाले १० जनाको परिवार आरनपेशाबाट पाल्दै आएको बताए ।
अरु आम्दानीको स्रोत केही नभएको बताउदै उनले औजार आधुनिक किसिमका भए आरन पेसाबाट राम्रो आम्दानी लिन सकिने बताए । काम गर्ने औजार पुरानै भएकाले औजारबाट सामान बनाउन मेहनत धेरै लाग्ने गरेको बताउदै उनले औजार आधुनिक किसिमका भए सामान बनाउन सजिलो हुने र आम्दानी पनि बढी लिन सकिने बताए । अरुलाई रोजगारी पनि दिन सकिने बताउदै उनले कृषि तथा घरायसी प्रयोजनका सबै सामान बनाउने गरेको बताए ।
नयाँ तयार गरिएको एउटा हँसिया एक हजारदेखि एक हजार पाँच सय, खुडा तीन हजारसम्ममा बिक्री हुने गरेको बताए । सोही ठाउँका खडक तिरुवाले पनि आरन व्यवसायबाट दैनिक एक हजार पाँच सयसम्म आम्दानी गर्ने गरेको बताए । मेहनत पनि छ, आम्दानी पनि हुन्छ, मैले कुटो, कोदालो, बञ्चरो, हँसिया लगायत कृषि तथा घरायसी प्रयोजनका सबै सामान बनाउने गरेको छु, तिरुवाले भने । पाँच जनाको परिवार छ । सबै घरखर्च, छोराछोरीको पढाइलेखाइ यसैबाट धानेको छु ।
आरनकै काम सिकेकाले अरु काम गर्न मन नलाग्ने बताउदै उनले पुरानै शैलीमा काम गरिने भएकाले मेहनत बढी लाग्ने गरेको बताए । व्यवसाय समयानुकूल आधुनिकीकरण हुनसके राम्रै आम्दानी हुने बताउदै उनले आरनमा काम गर्न दुई जना अनिवार्य चाहिने बताए । आधुनिक विद्युतीय औजार भएको भए काम गर्न सहज हुने बताउदै उनले आरनको लागी आवश्यक कोईला पाउन सकस हुने गरेको बताए ।
