बैशाख १६ धनगढी । नेपाली लेखक संघ कैलालीले द्वितीय राष्ट्रिय लेखक दिवस अन्तरकृया गर्दै मनाएको छ । आईतबार धनगढीमा नेपाली लेखक संघ कैलालीले राष्ट्रिय लेखक दिवस मनाएको हो । कार्यक्रमका प्रमुख अतिथि ऐश्वर्य बहुमुखी क्याम्पसका प्रमुख धर्मदेव भट्टले लेखकलाई समाजले विशेष किसिमले हेरिरहेको बताए ।
लेखकले समाजलाई रुपान्तरण गर्न साहित्य मार्फत विशिष्ट योगदान गर्न सक्ने भएकोले समाजमा व्याप्त सबै विसंगतिका विरुद्ध बोल्न सक्ने भनेकै लेखकहरू भएको बताउदै उनले सरकारलाई समेत जिम्मेवार बनाउन सक्ने बताए । त्यस्तै साहित्यकार नरेन्द्र भट्ट अन्जानले लेखक संघले परिवर्तित र रुपान्तरित समाज, व्यवस्था र प्रणालीमा देखिएका कमीकमजोरीलाई लेखन मार्फत सुधारका लागी बहस चलाएर समाज, व्यवस्था र प्रणालीलाई देश र जनताको हितमा जिम्मेवार बनाउन सक्ने बताए ।
त्यसैगरी लेखक संघका केन्द्रिय सदस्य गणेश बहादुर नेपालीले २००८ सालमा स्थापना भएको लेखक संघले देशको राजनीतिक संकटग्रस्त भएको बेला साहित्य मार्फत वैचारिक आन्दोलन र बहस गरि जनता र लोकतन्त्रका पक्षमा वकालत गरेको बताउदै आज पनि लोकतान्त्रिक व्यवस्था विरुद्ध अनेक षडयन्त्र हुन लागेकाले नेपाली लेखक संघ सशक्त भएर प्रस्तुत हुनुपर्ने बताए ।
कार्यक्रममा नेपाल कलाकर्मी संघकी केन्द्रिय उपाध्यक्ष द्रोपती भट्ट मेघा, नेपाल शिक्षक संघ नगर अध्यक्ष मोहन भण्डारी, साहित्यकार पदम राना वक्ताहरू रहेका थिए । लेखक संघका जिल्ला अध्यक्ष तीर्थराज पाण्डेयको अध्यक्षतामा सम्पन्न कार्यक्रमको सञ्ंचालन अध्येता चित्रराज भट्टले गरेका थिए ।
