भदौ ०८ धनगढी । धनगढी उपमहानगरपालिका वडा नम्बर ४ स्थित दक्षिणकाली हाट बजारमा धनगढी उपमहानगरपालिकाले डोजर चलाएको छ । शुक्रबार दिउँसो व्यवसायीहरुलाई कुनै जानकारी नदिई उप महानगरपालिकाले एक्कासी डोजर चलाएको हो । वर्षातको समयमा व्यवसाय गरिरहेको स्थानमा उप महानगरपालिकाले डोजर चलाए पछि व्यवसायीहरुको विचल्ली भएको छ । व्यवसायी यमराज रावलले पसलमा डोजर चलेपछि सामान कसरी व्यवस्थापन गर्ने भन्ने तिन्ताले सताएको बताए ।
हाट बजार भित्र बनेको पक्की गोदाम भित्र तरकारी, फलफूलका होलसेल पसलहरु रहेको बताउदै उनले सडक किनारमा रहेका केही कोठाहरुमा किराना, चिया पसलका साथै मासु पसल रहेको बताए । भुपु सैनिक सहकारी संस्थाले सम्झौता गरि विभिन्न व्यापारीहरुलाई व्यवसाय सञ्चालन गर्न अनुमति दिएको भुपु सैनिक सहकारी संस्थाका अध्यक्ष शंकर सिंह ऐरीले बताए । उनले भाडा सम्झौता गरेको ठेकेदारलाई मासिक रुपमा बुझाउँदै आइरहेको जानकारी गराए ।
अझै एक वर्षसम्मको सम्झौता बाँकी रहेको बताउदै उनले उप महानगरपालिकाले एक्कासी जानकारी नदिई डोजर चलाएको बताए । सटरका विषयमा पटक–पटक उप महानगरपालिकासंग संवाद भएको र सम्झौता गरेको मानिसलाई सटरबाट आएको भाडा बुझाउने भए पनि उप महानगरपालिकाले सिधै आफनो खातामा आउनु पर्ने दबाब दिइरहेको उनले बताए । एक सय २५ सेयर सदस्य रहेको उक्त सहकारीले ठेक्का सम्झौता गरेका ठेकेदारसंग साढे ४ लाख धरौटी जम्मा रहेको उनले बताए ।
उपमहानगरपालिकाले हाटबजार आफनो मातहातमा आइसकेकाले त्यहाँ भएका सम्पूर्ण व्यवसाय हटाउन डोजर चलाएको बताएको छ । धनगढीका ब्यवसायी ओम पाठकले ठेक्का सम्झौता गरेर चलाएको हाट बजारको गत पुसमा सम्झौता मिति सकिए पछि छ महिना भित्र खाली गर्न भनि पत्राचार गरिसकेको उप महानगरपालीकाले जनाएको छ । साउन देखिको भाडा उप महानगरपालिकालाई पनि नदिने हटन् पनि नमाने पछि डोजर चलाएको राजश्व शाखा प्रमुख योगेन्द्र प्रसाद चन्दले बताए ।
व्यवसायीहरुले भाडा पनि नदिने हटन् पनि नमाने पछि डोजर चलाएको बताउदै उनले सम्झौता सकीए पछि किसानका कोल्ड स्टोर पनि भएकाले साउन देखिको भाडा उप महानगरपालिकालाई दिन भनेको भए पनि अटेर गरेकाले डोजर चलाउन बाध्य भएको बताए । उनले हाटबजार हटाएर सपिङ कम्पलेक्स बनाउने योजना रहेको बताए । उनले सपिङ कम्पलेक्सका लागि विस्तृत परियोजना प्रतिवेदन (डिपिआर) तयार भइरहेको जानकारी गराए ।
