साउन ११ अछाम । अछामको बुढीगङ्गा जलविद्युत् आयोजनाको ठेक्का प्रक्रिया पूरा नहुदा आयोेजनाको काम अगाडी बढ्न सकेको छैन । २० मेगावाटको उक्त आयोजनाको समयमै ठेक्का प्रक्रिया पूरा नहुँदा निर्माण कार्य अगाडी बढ्न नसकेको हो । आयोजना निर्माणको मुख्य कामको समयमै ठेक्का नहुँदा निर्माण कार्य पछि धकेलिँदै गएको छ । आयोजना निर्माणको लागि तीन पटक सम्म ठेक्का प्रक्रिया रद्द हुँदा निर्माणको कार्य अघि बढ्न नसकेको हो ।
पावर हाउस, टनेल र ड्याम निर्माणका लागि अन्तर्राष्ट्रियस्तरको बोलपत्र आह्वान गरिए पनि तीनै पटक ठेक्का रद्द भएको बताईएको छ । आयोजना कार्यालयका सूचना अधिकारी तथा इन्जिनियर स्वतन्त्रकुमार कर्णका अनुसार ०७८ साल भदौमा गरिएको दुई चरणको ठेक्का प्रक्रियामा एउटा कम्पनीको मात्र बोलपत्र परेकाले उक्त ठेक्का प्रक्रिया रद्द गरिएको थियो । त्यसको छ महिना पछि चैतमा गरिएको एकल चरण ठेक्का प्रक्रियामा आएका कम्पनीले ठेक्का रकम भन्दा बढी ठेक्का हाले पछि उक्त प्रक्रिया पनि रोकिएको इन्जिनियर कर्णले बताए ।
आयोजनाले पुनः ०७९ साल असोजमा अन्तर्राष्ट्रियस्तरकै बोलपत्र आह्वान गरे पनि कम्पनीहरूले त्यसमा तोकिएको रकम भन्दा बढी ठेक्का हालेकाले प्रक्रिया अघि नबढेको इन्जिनियर कर्णले जानकारी गराए । इन्जिनियर कर्णले चौथो पटक बोलपत्र खोलिएकाले त्यसको प्रक्रिया पूरा भएपछि मात्र आयोजना स्थलका मुख्य निर्माणका काम हुने बताए । ठेक्का प्रक्रिया पटक पटक रद्द हुँदा आयोजना निर्माणमा ढिलाइ भइरहेको साँफेबगरका युवा कृष्ण बुढाले बताए ।
करिब १८ महिनामा सम्पन्न हुने डिपिआर ठेक्का प्रक्रियामै तीन वर्ष लागेपछि निर्माण समयमै सम्पन्न हुनेमा शंका उत्पन्न भएको छ । आयोजना स्थल नजिकै प्रशासनिक भवन, पावर हाउस जाने पहुँच मार्ग र पुल निर्माण भइसकेका छन भने आयोजनाका लागि अछाममा २ सय ५० रोपनी, डोटीमा ५० र बाजुरामा २० रोपनी जग्गाको मुआब्जा वितरण समेत भइसकेको बताइएको छ ।
छ अर्ब लागत अनुमान गरिएको उक्त आयोजनामा साउदी विकास कोषको तीन अर्ब २० करोड, कुवेत विकास कोषको एक अर्ब ८० करोड ऋण र बाँकी नेपाल सरकारले लगानी गर्ने गरी आयोजना सुुरु गरिएको हो । उत्पादित विद्युत् १ सय ३२ केभी प्रसारण लाइनबाट कैलालीको पहलमानपुरमा रहेको सब स्टेसनमा जोडिने बताईएको छ । करिब ८२ किलोमिटर लामो प्रसारण लाइन साँफेबगरबाट डोटी हुँदै कैलालीको पहलमानपुर सम्म पुग्ने आयोजनाले जनाएको छ ।
