माघ २७ धनगढी । कैलालीको मोहन्याल गाउँपालिकाका अध्यक्ष देवीदत्त उपाध्याय सहित १५ जनाले राजश्व रकम हिनामिना सम्बन्धी मुद्दामा सफाइ पाएका छन् । बिहीबार विशेष अदालतले राजश्व रकम हिनामिना सम्बन्धी मुद्दामा अध्यक्ष उपाध्याय सहित तत्कालीन गाउँ कार्यपालिका सदस्य र प्रमुख प्रशासकीय अधिकृत लगायत १५ जनालाई सफाइ दिएको हो ।
न्यायाधीशहरू यमुना भट्टराई, बलभ बास्तोला र डा. खुशीप्रसाद थारुको संयुक्त इजलासले राजश्व रकम हिनामिना सम्बन्धी मुद्दाका सबै १५ जना प्रतिवादीलाई सफाइ दिएको हो । अदालतमा मुद्दा परे पछि वर्तमान अध्यक्ष उपाध्यायले कामकाज समेत गर्न पाएका थिएनन् । गाउँपालिका कार्यबाहक अध्यक्षका भरमा चलिरहेको थियो । अख्तियार दुरुपयोग अनुसन्धान आयोगले तत्कालीन अध्यक्ष स्वर्गीय नवलसिंह रावल सहित १४ जनाविरुद्ध विशेष अदालतमा मुद्दा दायर गरेको थियो ।
मुद्दामा तत्कालीन गाउँपालिका उपाध्यक्ष पूजा देवी बुढामगर, सबै वडाध्यक्षहरू, प्रमुख प्रशासकीय अधिकृत र निर्माण व्यवसायी समेतलाई विपक्षी बनाइएको थियो । वर्तमान अध्यक्ष उपाध्याय तत्कालीन अवस्थामा वडा नम्बर २ का अध्यक्ष थिए । वडा नम्बर ३ का अध्यक्ष नन्दबहादुर गिरीले पनि सफाई पाएका छन । पुनः वडाध्यक्षमा विजयी भएका गिरीले पनि मुद्दाका कारण कामकाज गर्न पाएका थिएनन् ।
नदीजन्य पदार्थको उत्खनन र बिक्री वितरणमा निर्माण व्यवसायी कम्पनी न्यु बडिमालिका निर्माण सेवा र गाउँपालिकाका पदाधिकारीहरुको मिलेमतोमा भ्रष्टाचार भएको अख्तियारदुरुपयोग अनुसन्धान आयोगले दावी गर्दै मुद्धा दायर गरेको थियो ।
