माघ १२ जाजरकोट । जनपत्रकार संगठन नेपालका केन्द्रीय सदस्य कर्ण वहादुर वस्याल २५ दिनको हिरासत बसाई पछि रिहा भएका छन । गैरकानुनी रुपमा हिरासतमा राखिएका पत्रकार बस्याललाई २५ दिन हिरासतमा राखेर बुधवार रिहा गरिएको हो ।
केन्द्रीय सदस्य वस्याललाई प्रहरीले पौष १७ गते गैरकानुनी ढंगले पक्राउ गरेको थियो । नेपाल कम्युनिष्ट पार्टीको विचारसंग आस्था राख्ने जनपत्रकार संगठन नेपालका केन्द्रीय सदस्य वस्याललाई एक जना शिक्षकलाई कालो मोसो दलेको आरोपमा प्रहरीले पक्राउ गरेको थियो ।
नेकपाले आफ्नो पार्टीले कुशे गाउँपालिका, वडा नम्बर ४ स्थित भानुभक्त माध्यामिक विद्यालयका प्रधानाध्यापक रण बहादुर शाहीलाई कालो मोसो दलेको घटनामा सहभागी भएको शङ्काको आधारमा अनुसन्धान गर्नु पर्ने भन्दै बस्याललाई प्रहरीले पक्राउ गरेको थियो।
नेपाली काँग्रेस कुशे गाउँ कमिटीका सचिव समेत रहेका शिक्षक शाहीले विद्यालयमा भ्रष्टाचार तथा अनियमिता गरेको आरोपमा नेकपाले कार्वाही गरेको थियो । नेकपाका जाजरकोट जिल्ला सेक्रटरी विराजनले दिएको जानकारी अनुसार पत्रकार वस्याललाई जिल्ला अदालतकै आदेशमा बुधबार रिहाई गरिएको हो ।
२५ हजार धरौटीमा पत्रकार वस्याललाई अदालतले रिहाई गर्ने आदेश दिएको सेक्रेटरी विराजनले जानकारी दिए । रिहाई पछि पत्रकार वस्याललाई नेकपा, जाजरकोटले खाँदा सहित टीका लगाएर स्वागत गरेको उनले जानकारी गराए ।
