चैत्र २६ काठमाण्डौ । विद्युतीय चुरोट (भेप) मा लुकाएर सुन तस्करी गराएको आरोपमा पूर्वसभामुख एवम् नेपाली कम्युनिस्ट पार्टी (नेकपा) का नेता कृष्णबहादुर महरा र नेपाल सरकारका सहसचिव अरुण पोखरेल सहित २८ जनाविरुद्ध विशेष अदालतमा भ्रष्टाचार मुद्दा दायर गरिएको छ ।
चिनियाँ तस्करसँग मिलेर भेपको आवरणमा सुनको अवैध ओसार पसार गराएको अभियोगमा अख्तियार दुरुपयोग अनुसन्धान आयोगले महरा, पोखरेल तथा महराका छोरा राहुल सहित २८ जना र एउटा कम्पनीलाई प्रतिवादी बनाएर भ्रष्टाचार मुद्दा दायर गरिएको हो । अख्तियारले उनीहरूविरुद्ध ७ करोड ७८ लाख ६८ हजार रुपैयाँ बिगो कायम गरेको छ ।
२०७९ साल पुसमा चिनियाँ गिरोहले भेपको आवरणमा भित्र्याएको सुन पास गराउन पूर्वसभामुख महरा सहितका व्यक्तिले काम गरेको पाइएको अख्तियारका सहायक प्रवक्ता गणेशबहादुर अधिकारीले जानकारी गराए । अनुसन्धानका क्रममा भेपमा भित्रिएको सुन भारतको महाराष्ट्रका नन्दुकुमार राण्डुराम मर्गलेको भएको खुलेको थियो ।
चीनबाट भित्र्याएर दावाजिन वाङले भारतीय नागरिकसम्म तस्करीको सुन लैजाने योजना बनाए पनि सेटिङ बिग्रिएर यसको रहस्य बाहिरिएको थियो । माओवादी सशस्त्र द्वन्द्वमा सक्रिय महरा शान्ति प्रक्रिया पछि निरन्तर सत्ता–शक्तिमा रहेका छन् । २०६३ सालमा बनेको अन्तरिम सरकारमा मन्त्री बनेका महरा पछि उपप्रधानमन्त्री सहित अर्थ, गृह, परराष्ट्र जस्ता शक्तिशाली मन्त्रालय सम्हाल्दै सभामुख पनि बनेका थिए ।
पहिलो संविधानसभा चुनावलगत्तै चिनियाँसँग ‘नेपालमा सांसद खरिद–बिक्रीका लागि’ रकम मागेको भनिएको अडियो सार्वजनिक भए पछि महरा विवादमा तानिएका थिए । त्यसैगरी २०७४ सालमा प्रतिनिधिसभाको सभामुख बनेका उनलाई संसद् सचिवालयमै कार्यरत एक जना महिलामाथि बलात्कार गरेको आरोपमा बालुवाटारमा रहेको सभामुख निवासबाटै पक्राउ गरिएको थियो ।
