चैत्र २५ काठमाण्डौ । सरकारले सार्वजनिक यातायात तथा ढुवानी भाडामा वृद्धि गर्ने निर्णय गरेको छ । यातायात व्यवस्था विभागले भौतिक पूर्वाधार तथा यातायात मन्त्रालयबाट सैद्धान्तिक स्वीकृति पाएपछि सार्वजनिक यातायात तथा ढुवानी भाडामा वृद्धि गर्ने निर्णय गरेको हो ।
नेपाल यातायात व्यवसायी राष्ट्रिय महासंघका वरिष्ठ उपाध्यक्ष सरोज सिटौलाका अनुसार सार्वजनिक यातायातको भाडा १६.७१ प्रतिशतले बढाइएको छ । त्यस्तै मालवाहक सवारी साधनतर्फ पनि उल्लेख्य वृद्धि गरिएको छ । पहाडी क्षेत्रमा सञ्चालन हुने मालवाहक सवारीको भाडा २१.६८ प्रतिशतले बढाइएको छ भने तराई क्षेत्रमा सञ्चालन हुने सवारीको भाडा १५.७५ प्रतिशतले वृद्धि गरिएको छ ।
यातायात व्यवस्था विभागका अनुसार विस्तृत नयाँ भाडादर केही दिनभित्रै विभागको आधिकारिक वेबसाइट मार्फत सार्वजनिक गरिनेछ । मन्त्रालयले भाडा समायोजनका लागि आवश्यक प्रक्रिया अघि बढाइसकेको जनाएको छ ।
अन्तर्राष्ट्रिय बजारमा पेट्रोलियम पदार्थको मूल्य वृद्धि तथा सवारी सञ्चालन लागत बढ्दै जाँदा लामो समय देखि व्यवसायीहरूले भाडा समायोजनको माग गर्दै आएका थिए । यही सन्दर्भमा सरकारले नयाँ भाडादर लागू गर्ने निर्णय गरेको हो । नयाँ भाडादर लागू भएपछि यात्रुहरूलाई थप आर्थिक भार पर्ने र उपभोग्य वस्तुको मूल्यमा समेत असर पर्ने अनुमान गरिएको छ ।
