चैत्र २५ धनगढी । सुदूरपश्चिम प्रदेशको बहुप्रतीक्षित स्वास्थ्य शिक्षा केन्द्रका रूपमा रहेको सहिद दशरथ चन्द स्वास्थ्य विज्ञान विश्वविद्यालयमा पठनपाठन सुरु हुने भएको छ । धनगढीको गेटास्थित सहिद दशरथ चन्द स्वास्थ्य विज्ञान विश्वविद्यालयमा आगामी शैक्षिक सत्र देखि चिकित्सा शिक्षाको पठनपाठन सुरु हुने भएको हो । विश्वविद्यालय सभाको चौथो बैठकले विभिन्न चार वटा सङ्कायमा अध्ययन अध्यापन सुरु गर्ने निर्णय गरेपछि औपचारिक रूपमा चिकित्सा शिक्षाको पठनपाठन सुरु हुने भएको हो ।
शिक्षा, विज्ञान तथा प्रविधि, युवा तथा खेलकुद मन्त्री सस्मित पोखरेलको अध्यक्षतामा सम्पन्न बैठकले विश्वविद्यालय सञ्चालनसँगै विद्यार्थी भर्ना कोटा पनि निर्धारण गरेको छ । विश्वविद्यालयका उपकुलपति प्रा.डा. सुनिलकुमार जोशीले आगामी शैक्षिक सत्रदेखि कक्षाहरू औपचारिक रूपमा सञ्चालन गरिने जानकारी गराए । निर्णय अनुसार ५० जना एमबिबिएस, ३० जना बीएस्सी नर्सिङ, २० जना बीएमएलटी र २० जना अप्टोमेट्रीतर्फ विद्यार्थी भर्ना गरिने उनले जानकारी गराए ।
साथै, ३ सय शैयाको शिक्षण अस्पताल सञ्चालन गर्ने तयारी समेत अघि बढाइएको उनले जानकारी गराए । सरकारले विश्वविद्यालय सञ्चालनका लागि आवश्यक वित्तीय स्रोतसमेत सुनिश्चित गरेको छ । शिक्षा, विज्ञान तथा प्रविधि मन्त्रालयले ७५ प्रतिशत छात्रवृत्तिको व्यवस्था गरिसकेको छ । आर्थिक वर्ष ०८२÷८३ को जेठ–असारका लागि चिकित्सकहरूको तलब बाफत ५ करोड रुपैयाँ बजेट उपलब्ध भइसकेको छ भने आगामी वर्षका लागि २ अर्ब ५३ करोड रुपैयाँ बजेट माग गर्दै अर्थ मन्त्रालयमा प्रस्ताव पेश गरिएको छ ।
बैठकले विश्वविद्यालय सभामा दुई जना महिला र दुई जना पुरुष सदस्य मनोनीत गरेको भए पनि उनीहरूको नाम भने सार्वजनिक गरिएको छैन । यसअघि विश्वविद्यालयका तीन वटा बैठक संघीय राजधानी काठमाडौंमा बसेका थिए भने पहिलो पटक गेटामै बैठक सम्पन्न भएको हो । कानुनी व्यवस्था अनुसार विश्वविद्यालयको सर्वोच्च निकायका रूपमा सभा गठन गरिएको छ । जसको अध्यक्ष शिक्षामन्त्री रहने प्रावधान छ ।
सभामा स्वास्थ्यमन्त्री, सुदूरपश्चिम प्रदेशका मुख्यमन्त्री, विश्वविद्यालय अनुदान आयोगका अध्यक्ष, चिकित्सा शिक्षा आयोगका उपाध्यक्ष, उपकुलपति तथा गोदावरी नगरपालिकाका प्रमुख सदस्य रहने व्यवस्था छ । साथै अन्य विश्वविद्यालयका एक जना उपकुलपति सदस्य रहने प्रावधान अनुसार सुदूरपश्चिम विश्वविद्यालयका उपकुलपति प्राःडाः हेमराज पन्तलाई यसअघि नै मनोनयन गरिएको थियो ।
गोदावरी नगरपालिका वडा नम्बर–५ मा करिब ५१ हेक्टर क्षेत्रफलमा फैलिएको विश्वविद्यालयमा हालसम्म नेपाल सरकारले ६ अर्ब रुपैयाँभन्दा बढी लगानी गरिसकेको छ । ४२ वटा भवन निर्माण सम्पन्न भइसकेका छन् । २०८० साल माघ २९ गतेको मन्त्रिपरिषद् बैठकले विश्वविद्यालय स्थापना तथा सञ्चालन गर्ने निर्णय गरेको थियो । शिक्षामन्त्री सस्मित पोखरेलले आवश्यक बजेट सुनिश्चित भइसकेकाले आगामी शैक्षिक सत्रदेखि जसरी पनि पठन पाठन सुरु हुने उदघोष गरेका छन ।
यो परियोजना देशकै गौरवको योजना भएकाले कुनै पनि हालतमा कार्यान्वयनमा लैजाने उनले बताए । कैलाली क्षेत्र नम्बर ५ का प्रतिनिधिसभा सदस्य डा. आनन्द चन्दले विश्वविद्यालय सञ्चालनमा कुनै शंका नरहेको बताउदै यसले सुदूरपश्चिम प्रदेशमा शिक्षा र स्वास्थ्य सेवामा नयाँ अवसर सिर्जना गर्ने बताए ।
सहिद दशरथ चन्द स्वास्थ्य विज्ञान विश्वविद्यालय सञ्चालनमा आउनु सुदूरपश्चिमका लागि ऐतिहासिक उपलब्धिका रूपमा हेरिएको छ । यसले क्षेत्रमै गुणस्तरीय चिकित्सा शिक्षा उपलब्ध गराउनुका साथै स्वास्थ्य सेवाको विस्तारमा टेवा पुग्ने अपेक्षा गरिएको छ । साथै, उच्च शिक्षा अध्ययनका लागि बाहिर जानुपर्ने बाध्यता कम हुने र क्षेत्रीय विकासमा समेत महत्वपूर्ण योगदान पुग्ने विश्वास गरिएको छ ।
