चैत्र २० काठमाडौँ । नेपाल प्रहरीले ठूलो संख्यामा प्राविधिक जनशक्ति भर्ना गर्न दरखास्त आह्वान गरेको छ । प्रहरी प्रधान कार्यालय, मानवश्रोत विकास विभाग अन्तर्गत भर्ना छनौट शाखाले सूचना जारी गर्दै प्राविधिक प्रहरी समूहका विभिन्न उपसमूहतर्फ रिक्त पदहरू खुला प्रतियोगिता मार्फत समावेशी आधारमा पूर्ति गरिने जनाएको हो ।
जारी सूचना अनुसार सूचना प्रविधि निर्देशनालय, सञ्चार निर्देशनालय, भौतिक पूर्वाधार निर्देशनालय, सवारी महाशाखा, केन्द्रीय विधि विज्ञान प्रयोगशाला तथा प्रहरी अस्पताल लगायतका निकायका लागि कुल ६ सय ७ जना नयाँ कर्मचारी नियुक्ति गरिने छ ।
प्राविधिक प्रहरी नायव उपरीक्षक, प्रहरी निरीक्षक, प्रहरी नायव निरीक्षक र प्रहरी सहायक निरीक्षक पदका लागि चैत २५ गते देखि वैशाख २४ गतेसम्म आवेदन दिन सकिने व्यवस्था गरिएको छ । त्यसैगरी, प्राविधिक प्रहरी जवान पदका लागि चैत २६ गतेदेखि वैशाख ३१ गतेसम्म दरखास्त दिन सकिने उल्लेख गरिएको छ ।
