चैत्र २० धनगढी । कैलालीको अत्तरियामा रहेको सुप समावेशी आधारभूत विद्यालयलाई खाद्यान्न सहयोग गरिएको छ । अत्तरियामा रहेको थ्रिडिभिएल बहुउद्देश्यिय सहकारी संस्था लिमिटेडले विद्यालयलाई खाद्यान्न सहयोग गरेको हो ।
उद्यमशीलता र पारदर्शिताः सहकारीको अपरिहार्यता” भन्ने मुल नाराका साथ शुक्रबार ६९औ सहकारी दिवसको अवसरमा विद्यालयलाई खाद्यान्न सहयोग गरिएको सहकारीका अध्यक्ष दिपक ओझाले जानकारी गराए । फरक क्षमता भएका विद्यार्थीहरुको सम्मान स्वरुप खाद्यान्न सहयोग गरिएको उनले बताए ।
सुप समावेशी विद्यालयलाई प्रविधि मैत्री बनाउन आवश्यक रहेको बताउदै उनले विश्व प्रविधिमैत्री बन्दै गएको अबश्थामा फरक क्षमता भएका बालबालिकाहरुले कुर्चिमै बसेर पनि आयआर्जन गर्न सक्ने अवस्था सृजना गर्न आवश्यक भएको बताए ।
त्यसका लागि थ्रिडिभिएलले योजना बनाईरहेको उनले बताए । त्यसअघि सहकारीले ओलानीका क्यान्सर पिडित हेमन्त बडैलाको परिवारलाई पनि सहयोग गरेको उनले बताए ।
आर्थिक अवस्था कमजोर भएका बडैलाको परिवारलाई सहकारीले सामाजिक उत्तरदायित्व अन्तरगत केही खाद्यान्न र आर्थिक सहयोग गरेको अध्यक्ष ओझाले जानकारी गराए ।
