चैत्र १९ बाजुरा । बाजुराको हिमाली गाउँपालिकाले १ सय ४२ जना छुट मुक्त हलियाहरुलाई मुक्त हलिया परिचय पत्र वितरण गरेको छ । बुधबार एक समारोहका बीच गाउँपालिकाका अध्यक्ष गोविन्द बहादुर मल्लले छुट मुक्त हलियाहरुलाई परिचय पत्र वितरण गरेका हुन् ।
राष्ट्रिय मुक्त हलिया समाज महासंघ नेपालको कानूनी तथा प्राविधिक सहयोगमा गाउँपालिकाले वि.सं. २०८० सालमा मुक्त हलिया पुनःस्थापना कार्यबिधि पारित गरि तथ्यांक संकलन गरेको थियो ।
तथ्यांक संकलन गरेका मुक्त हलियाहरुको प्रमाणिकरण तथा वर्गिकरण गरि १ जनाले ‘क’ वर्ग र १ सय ४१ जनाले ‘ख’ वर्गको परिचय पत्र प्राप्त गरेको संस्थाका सामुदायिक सहजकर्ता जनसरी सार्कीले जानकारी गराएकी छिन । ‘क’ वर्गको रातो परिचय पत्र पाएका हिमाली गाउँपालिका वडा नम्बर– ६ बस्ने रंग लुहारले खुशी व्यक्त गर्दै स्थानीय सरकारलाई धन्यवाद दिएका छन ।
उनले सरकारले छिट्टै पुनःस्थापना गर्नु पर्ने माग पनि गरेका छन । परिचय पत्र पाएपछि हलियाहरु उत्साहित भएका छन भने अव छिट्टै सरकारले पुनःस्थापना कार्यक्रम ल्याउनु पर्ने हलिया आन्दोलनका अगुवा कलुवा लुहारले बताएका छन ।
गाउँपालिका अध्यक्ष गोविन्द बहादुर मल्ल र उपाध्यक्ष राजकला सार्कीले स्थानीय सरकारद्वारा परिचय पत्र वितरण गरेका हलियाहरुको छिटो पुनःस्थापना गर्न प्रदेश र संघीय सरकारको सहयोग आवश्यक रहेको बताए ।
संघीय सरकारले मुक्त हलिया पहिचान र पुनःस्थापनाको अख्तियारी स्थानीय सरकारलाई हस्तान्तरण गरेपछि लामो समय देखि राष्ट्रिय मुक्त हलिया समाज महासंघ नेपालले स्थानीयतहहरुसँग मुक्त हलियाहरुको पहिचान र पुनःस्थापनाका लागि निरन्तर वकालत गर्दै आएको संस्थाले जनाएको छ ।
छुट मुक्त हलियाहरुको प्रमाणिकरण, वर्गिकरण र परिचय वितरण प्रक्रियामा राष्ट्रिय मुक्त हलिया समाज महासंघ नेपालले लुथरन बिश्व फेडेरेशन नेपालसँगको सहकार्यमा संचालित स्थानीय देखि विश्वव्यापी मानव अधिकार वकालत मार्फत नेपालमा सीमान्तकृत समुदाय र सामाजिक रुपमा बहिष्कृत जनसंख्याको सशक्तिकरण एलटुजी परियोजनाले व्यवस्थापकीय सहयोग गरेको जनाइएको छ ।
संस्थाद्वारा संचालित एलटुजी परियोजनाको सहयोगमा यो महत्वपूर्ण उपलब्धी भएको र यस्ता अभियानहरुलाई अझै अन्य पालिकाहरुमा पनि निरन्तर अधि बढाउने योजना रहेको संस्थाका कार्यकारी निर्देशक हरिसिंह बोहराले जानकारी गराए ।
