चैत्र १७ धनगढी । विद्यालय शिक्षा प्रणालीलाई सुदृढ र प्रभावकारी बनाउने उद्देश्य सहित सञ्चालन गरिएको प्राविधिक सहयोग मार्फत विद्यालय शिक्षा क्षेत्र सुदृढीकरण परियोजना (TECSES) सुदूरपश्चिम प्रदेशमा औपचारिक रुपमा सुरु भएको छ ।

संघीय तथा प्रदेश सरकारका उच्चस्तरीय प्रतिनिधि, फिनल्यान्ड दूतावास, युरोपियन युनियन, स्थानीय तहका जनप्रतिनिधि तथा शिक्षा क्षेत्रमा क्रियाशील विकास साझेदारहरूको सहभागितामा कार्यक्रमको आयोजना गरी प्राविधिक सहयोग मार्फत विद्यालय शिक्षा क्षेत्र सुदृढीकरण परियोजना (TECSES) सुदूरपश्चिम प्रदेशमा औपचारिक रुपमा सुरु भएको हो ।

परियोजनाका प्रादेशिक संयोजक रामदास चौधरीले फिनल्यान्ड र युरोपियन युनियनको संयुक्त लगानीमा सञ्चालन भइरहेको परियोजनाले नेपाल सरकारको विद्यालय शिक्षा क्षेत्र योजना कार्यान्वयनमा टेवा पु¥याउने लक्ष्य राखेको बताए ।

परियोजनाले गुणस्तरीय र समावेशी शिक्षामा सुधार ल्याउन शिक्षा, विज्ञान तथा प्रविधि मन्त्रालय, विश्वविद्यालयहरू तथा प्रदेश र स्थानीय तहसँग सहकार्य गर्दै अघि बढ्ने उनले बताए । परियोजना कर्णाली, मधेश र सुदूरपश्चिम प्रदेशमा लागू भइरहेको जानकारी गराउदै उनले सन् २०२४ मा कर्णालीबाट सुरु भएको कार्यक्रम अहिले अन्य दुई प्रदेशमा विस्तार भएको बताए ।

पाँच वर्षे अवधिको परियोजना सन् २०२९ सम्म सञ्चालन हुने उनले जानकारी गराए । मन्त्रालयका सचिव डा. हेमराज रेग्मीको अध्यक्षतामा सम्पन्न भएको कार्यक्रम्मा परियोजनाको उद्घाटन सुदूरपश्चिम प्रदेशका सामाजिक विकास मन्त्री मेघराज खड्काले गरेका थिए ।

कार्यक्रममा लक्षित स्थानीय तहका प्रमुख, प्रमुख प्रशासकीय अधिकृत तथा शिक्षा शाखा प्रमुखहरूको उपस्थिति रहेको थियो । कार्यक्रमलाई सम्बोधन गर्दै मन्त्री खड्काले सक्षम र स्वस्थ नागरिक निर्माणका लागि गुणस्तरीय शिक्षा अपरिहार्य भएको बताउदै परियोजनाले महत्वपूर्ण योगदान गर्ने बताए ।

उनले परियोजनाको प्रभावकारी कार्यान्वयनमा स्थानीय तहको भूमिका निर्णायक हुने बताउदै परियोजनाले संघीय, प्रादेशिक र स्थानीय सरकारसँगै विश्वविद्यालयहरूसँग सहकार्य गर्दै शिक्षक शिक्षाको दीर्घकालीन विकासमा योगदान पु¥याउने बताए ।

शिक्षा तालिम केन्द्र, शिक्षा विकास निर्देशनालय तथा प्रदेशको सामाजिक विकास मन्त्रालय प्रमुख साझेदारका रूपमा रहेको परियोजनाले प्रदेशका नौ वटा स्थानीय तहसँग मिलेर विद्यालय र शिक्षकलाई सशक्त बनाउने काम गर्ने उनले बताए ।

त्यसैगरी सुदूरपश्चिम विश्वविद्यालय मार्फत दुई वटा विषयमा विशेषज्ञता सहितका नयाँ पाठ्यक्रम विकास भइरहेको जनकारी गराउदै उनले जसले शिक्षक शिक्षाको गुणस्तर अभिवृद्धिमा सहयोग पु¥याउने अपेक्षा गरिएको बताए ।

परियोजनाका प्रादेशिक संयोजक चौधरीले स्थानीय तह, शैक्षिक संस्था तथा साझेदार निकायसँग समन्वय गर्दै काम भइरहेको जानकारी गराए । शिक्षकहरूको आत्मविश्वास वृद्धि हुँदै गएको र विद्यालयहरू विशेषगरी सीमान्तकृत तथा अपाङ्गता भएका बालबालिकाका लागि थप समावेशी बन्दै गएको उनले बताए ।

फिनल्यान्ड नेपालका लागि दीर्घकालीन शिक्षा साझेदारको रूपमा परिचित भएको बताउदै उनले शिक्षामा पहुँच विस्तार, गुणस्तर सुधार तथा समावेशितामा निरन्तर योगदान दिँदै आएको बताए । परियोजनामा फिनल्यान्डका विभिन्न शैक्षिक संस्था तथा गैरसरकारी साझेदारहरूको प्राविधिक सहयोग रहेको उनले बताए ।