चैत्र १५ धनगढी । नेकपा एमालेका अध्यक्ष केपी शर्मा ओलीलाई पक्राउ गरेको विरोधमा सुदूरपश्चिम प्रदेशको धनगढीमा आइतबार पनि प्रदर्शन गरिएको छ ।
एमालेको पूर्वनिर्धारित कार्यक्रम अनुसार सुदूरपश्चिम प्रदेशको धनगढीमा आइतबार पनि प्रदर्शन गरिएको हो ।
ओलीको तत्काल रिहाइको माग गर्दै एमाले कार्यकर्ताहरूले आईतबार जिल्ला प्रशासन कार्यालय अगाडी प्रदर्शन गरेका छन् ।
कैलालीको धनगढी र कञ्चनपुरको महेन्द्रनगरमा प्रदर्शनकारी र प्रहरीबिच केही बेर धकेलाधकेल समेत भएको थियो ।
प्रदर्शनका क्रममा कार्यकर्ताहरूले सरकारविरुद्ध चर्का नारा लगाउँदै राजनीतिक प्रतिशोधका आधारमा अध्यक्षलाई पक्राउ गरिएको आरोप लगाएका छन् ।
पार्टीको पूर्वनिर्धारित कार्यक्रम अनुसार सुदूरपश्चिम प्रदेशका सबै जिल्ला प्रशासन कार्यालय मार्फत सरकारलाई ज्ञापनपत्र बुझाउने क्रम जारी रहेको एमाले सुदूरपश्चिम प्रदेशले जनाएको छ ।
ज्ञापनपत्रमा अध्यक्ष ओलीलाई बिना सर्त रिहा नगरे आन्दोलनलाई थप सशक्त बनाउने चेतावनी दिइएको छ ।
