चैत्र १५ धनगढी । कैलालीमा सरकारी जागिर लगाइ दिने तथा अनुदान उपलब्ध गराइदिने प्रलोभन देखाएर ठगी गरेको आरोपमा प्रहरीले तुलाराम कोलीलाई पक्राउ गरेको छ ।
डोटीको आदर्श गाउँपालिका वडा नम्बर–२ का ३३ वर्षीय तुलाराम कोलीलाई प्रहरीले पक्राउ गरेको हो । जिल्ला प्रहरी कार्यालयका प्रवक्ता प्रहरी नायव उपरिक्षक योगेन्द्र तिमिल्सिनाले हाल कैलालीको गोदावरी नगरपालिका वडा नम्बर–६ लालपुरमा बस्दै आएका कोलीलाई उनकै निवासबाट पक्राउ गरिएको जानकारी गराएका हुन ।
कोलीलाई जिल्ला प्रहरी कार्यालयको हिरासतमा राखी ठगी मुद्दामा थप अनुसन्धान भइरहेको उनले जानकारी गराएका छन । उनीविरुद्ध अहिलेसम्म विभिन्न व्यक्तिबाट ठगी गरेको भन्दै १० वटा उजुरी दर्ता भइसकेको उनले बताए ।
प्रारम्भिक अनुसन्धानमा करिब १ करोड २० लाख रुपैयाँ बराबरको ठगी भएको खुलेको छ भने बाँकी विवरण अनुसन्धानका क्रममा खुल्ने बताईएको छ ।
