चैत्र ११ बाजुरा । बाजुराको जडाङ्गा खोलामा रहेको बेलिब्रिज पुल दानसाँघु खोलामा स्थानान्तरण गरिने भएको छ । सरोकारवाला निकाय र स्थानीयबीच सहमति भएपछि उक्त पुल जिल्लाको बुढीनन्दा नगरपालिका वडा नम्बर–२ स्थित दानसाँघु खोलामा स्थानान्तरण गरिने भएको हो ।
गत मंसिर ४ गते दानसाँघु खोलामा एक कार्यक्रमका बिच बुढीनन्दा नगरपालिकाका उपप्रमुख रामबहादुर बोहराले बेलिब्रिज पुलको शिलान्यास गरेका थिए । साँफे–मार्तडी सडकखण्ड अन्तर्गत जडाङ्गास्थित प्रयोगविहीन अवस्थामा रहेको बेलिब्रिजलाई हाल दानसाँघु खोलामा स्थानान्तरण गर्न थालिएको बुढीनन्दा नगरपालिकाले जनाएको छ ।
नगरप्रमुख जनकबहादुर बोहराले जिल्लाका चारवटा स्थानीय तहका बासिन्दाको आवागमन सहज बनाउन उक्त पुल स्थानान्तरण गर्न लागिएको बताए । पुल यसअघि पनि दानसाँघुमा सार्ने पहल गरिएको बताउदै उनले केही समय विवाद भएको बताए । पछि सहमति भए पनि आर्थिक अभावका कारण लामो समयसम्म जडाङ्गा खोलामै रोकिएको उनले बताए ।
बुढीनन्दा नगरपालिकाको पहल तथा सडक डिभिजन कार्यालय साँफेबगरको आर्थिक सहयोगमा पुल स्थानान्तरण कार्य अघि बढाइएको उनले जानकारी गराए । पछिल्ला पाँच वर्षदेखि उक्त पुल जडाङ्गा खोलामा अलपत्र अवस्थामा रहेको बताउदै उनले सुरुमा त्यहाँ पक्की पुल नहुँदा बेलिब्रिज उपयोगी भए पनि पछि नजिकै पक्की पुल निर्माण भएपछि प्रयोगविहीन बनेको बताए ।
सडक डिभिजन कार्यालय अछामका अनुसार करिब २ करोड २२ लाख रुपैयाँको लागतमा जडाङ्गाबाट दानसाँघु खोलामा बेलिब्रिज स्थानान्तरणको काम भइरहेको छ । साँफे–मार्तडी सडक खण्ड अछामको साँफेबगर देखि मार्तडी सम्म करिब ५७ किलोमिटर लामो छ भने मार्तडी देखि कोल्टीसम्म करिब ४२ किलोमिटरको दूरी रहेको छ । त्यसैगरी कोल्टी देखि धुलाचौर सम्म करिब १६ किलोमिटर सडक रहेको छ ।
