चैत्र ०९ धनगढी । नेकपा एमाले भित्र आन्तरिक विवाद चर्किदै गएको छ । राजनीतिक नियुक्तिबाट सुरु भएको नेकपा एमाले भित्रको आन्तरिक विवाद चर्किदै गएको हो । आन्तरिक विवाद अहिले प्रदेश सभामा संसदीय दलको नेता परिवर्तन गर्ने सम्म पुगेको बताइएको छ ।
संसदीय दलका नेता तथा पूर्वमुख्य मन्त्री राजेन्द्र सिंह रावलको कार्यशैली प्रति असन्तुष्टि बढ्दै जाँदा प्रदेश कमिटी र उनी निकट सांसदहरू बीच दूरी बढेको छ । विशेषगरी विभिन्न सरकारी निकायमा नियुक्ति गर्दा पार्टीसँग समन्वय नगरेको आरोप रावलमाथि लागेको छ ।
प्रदेश अध्यक्ष कृष्णप्रसाद जैशी लगायतका नेताहरूले रावलले पार्टीको परामर्शविना आफ्नै ढङ्गले नियुक्ति सिफारिस गरेको भन्दै आपत्ति जनाएका छन् । उनीहरूले यसलाई संस्थागत निर्णय विपरीत र समानान्तर शक्ति सञ्चालनको प्रयासका रूपमा व्याख्या गरेका छन् ।
विवाद अझ चर्किने क्रममा राष्ट्रिय युवा संघ नेपाल कञ्चनपुरको कृष्णपुर नगर कमिटीले संसदीय दलको कार्यालयमा तालाबन्दी गरेको छ । युवाहरूले रावल सम्पर्क विहीन भएको र पार्टीविरोधीलाई नियुक्ति दिएको आरोप लगाएका छन् ।
रावलले भने सबै आरोप अस्वीकार गर्दै नियुक्तिहरू पार्टीकै सल्लाहमा भएको दाबी गरेका छन् । आफू स्वास्थ्य समस्याका कारण केही समय सम्पर्कमा नरहेको उनले बताएका छन ।
खप्तड पर्यटन विकास समितिको अध्यक्षमा जमुना चन्दलाई सिफारिस गरेपछि विवाद चर्किदै गएको हो । रावलले महिलालाई नेतृत्वमा ल्याउने प्रयास गरेको बताएका छन् भने पार्टीका अन्य नेताहरूले यसलाई गुटगत राजनीतिको संज्ञा दिएका छन ।
एमालेका अधिकांश प्रदेश सभा सदस्यहरू अहिले रावलको विकल्प खोज्ने पक्षमा देखिएका छन् । संसदीय दलको नेताका लागि उपनेता सन्तोष कुमारी शर्मा थापा, प्रमुख सचेतक चक्रबहादुर मल्ल र सामाजिक विकास समिति सभापति धर्मराज पाठकको नाम चर्चामा आएको छ ।
यद्यपि, पार्टी केन्द्रको निर्देशन नआए सम्म संसदीय दलको नेता परिवर्तन प्रक्रिया अघि नबढ्ने स्रोतले जनाएको छ ।
