कञ्चनपुरको बेलडाँडी गाउँपालिकामा रहेको गणेश माध्यमिक विद्यालयमा शिक्षक दरबन्दी मिलान सम्बन्धी भएको विबादका कारण ६ महिना देखि गणित विषयको पठनपाठन अवरुद्ध भएको छ ।
बेलडाँडी गाउँपालिकाको वडा नंम्बर ५ भुर्सास्थित गणेश माध्यमिक विद्यालयमा शिक्षक दरबन्दी मिलानमा भएको विवादका कारण ६ महिना देखि गणित विषयको पठनपाठन अवरुद्ध भएको हो ।
गत असोज ९ गते बसेको गाउँ कार्यपालिका बैठकले वडा नम्बर २ स्थित रौलेश्वर माध्यमिक विद्यालयका प्रधानाध्यापक तथा गणित शिक्षक कृपाराम उपाध्यायलाई दरबन्दी मिलान तथा व्यवस्थापनका लागि गणेश माध्यमिक विद्यालय, मोहनपुर भुर्सामा पदस्थापन गर्ने निर्णय गरेको थियो ।
शिक्षा शाखा प्रमुख भानुभक्त जोशीले तयार पारेको प्रस्तावका आधारमा गाउँपालिका अध्यक्ष हरिसचन्द्र रानाले गणित विषयका स्थायी शिक्षक उपाध्यायलाई गणित विषयको स्थायी दरबन्दी नभएको गणेश माध्यामीक विद्यालयमा राहत दरबन्दीमा मिलान गर्ने निर्णय गरेपछि उपाध्याय असन्तुष्ट बनेका थिए ।
वि.सं.२०७६ देखि रौलेश्वर माध्यामीक विद्यालयमा गणित शिक्षक तथा प्रधानाध्यापक रहेका उपाध्यायले उक्त निर्णय विरुद्ध प्रशासकीय अदालतमा निर्णय खारेजीको माग गर्दै निवेदन दर्ता गरेका थिए ।
अदालतले स्थानीय सरकार सञ्चालन ऐन, २०७४, शिक्षा ऐन, २०८२, शिक्षा नियमावली, २०५९, शिक्षक सरुवा निर्देशिका,२०८१ तथा शिक्षक दरबन्दी मिलान तथा व्यवस्थापन कार्यविधि, २०७६ विपरीत पदस्थापन गरिएको ठहर गरेको छ ।
अदालतले उपाध्यायलाई रौलेश्वर माध्यामीक विद्यालयमै अध्यापन गराउन आदेश दिएको भए पनि गाउँपालिकाले उक्त आदेशविरुद्ध पुनरावेदन दिएको थियो । पुनरावेदनको टुङ्गो नलाग्दा सम्म उपाध्यायलाई यथास्थितिमा राख्न अदालतले गत कात्तिक २७ गते अन्तरिम आदेश जारी गरेको थियो ।
अदालतको आदेश अवज्ञा गर्दै गाउँपालिका अध्यक्ष राना र शिक्षा शाखा प्रमुख जोशीले उपाध्यायलाई गणेश माध्यामीक विद्यालयमा अध्यापन गराउन दबाब दिएको गाउँपालिकाका उपाध्यक्ष शान्ति नाथले बताईन । कार्यविधि विपरीत निर्णय नगर्न आग्रह गर्दा पनि मनोमानी भएको उनले बताएकी छिन ।
गणेश माध्यामीक विद्यालयमा गणित शिक्षक अभाव हुँदा विद्यार्थीहरूको पठन पाठन प्रभावित बनेको छ । साथै, शिक्षा शाखाले विगत ६ महिना देखि उपाध्यायको तलब समेत रोक्का गरेको पाइएको छ । रौलेश्वर माध्यामीक विद्यालयमा अध्यापन गराउँदै आएका उपाध्यायले लामो समय देखि तलब नपाएको गुनासो गरेका छन ।
शिक्षा शाखा प्रमुख जोशीले भने गणेश माध्यामीक विद्यालयमा शिक्षक अभाव भएपछि उपाध्यायलाई पठाउन खोजिएको भए पनि नजाँदा समस्या भएको बताएका छन ।
आगामी शैक्षिक सत्रदेखि नियमित पठनपाठन सञ्चालन गर्न पहल गरिने उनले बताए । केही दिन भित्रै फागुन सम्मको तलब खातामा पठाइने पनि उनले जानकारी गराएका छन ।
