चैत्र ०८ बाजुरा । बजारमा ग्यास अभाव भएको हल्ला फैलिए पछि बाजुराका अधिकांश ग्रामीण बस्तीका महिलाहरूले दाउरा सङ्कलन गर्न थालेका छन ।
केही दिनयता बजारमा ग्यासको अभाव हुन थालेको सूचना पाएपछि ग्रामीण बस्तीका महिलाहरूले खाना पकाउने वैकल्पिक स्रोतका रूपमा वनबाट दाउरा सङ्कलन गर्न थालेका हुन् ।
बुढीनन्दा नगरपालिका निवासी पारु रोकायाले बजारमा ग्यास नपाइने भन्ने सुनेपछि दाउरा संकलन गर्न थालेको बताईन । दैनिक रूपमा दाउराकै प्रयोग हुने भए पनि कहिलेकाहीँ ग्यास प्रयोग गरिँदै आएको बताउदै उनले ग्यास अभावको हल्ला पछि पुनः दाउरामै निर्भर हुनुपरेको बताईन ।
धेरैजसो स्थानमा विशेष गरी वर्षा र खेतीपातीको समयमा ग्यास प्रयोग हुने गरेको भए पनि ग्यास अभावको चर्चा बढ्न थालेपछी महिलाहरुले दाउरा सङ्कलन गर्न थालेका हुन् । केही स्थानीयले भने गाउँ क्षेत्रमा ग्यास अभावको प्रभाव खासै नपरेको बताएका छन् ।
बुढीगङ्गा नगरपालिका वडा नम्बर–६ बाम्का बजारस्थित विनोद जनरल स्टोरका सञ्चालक भगतराज गिरीले बजारमा ग्यास अभाव भएको चर्चा चले पनि बाम्का लगायतका बजारमा हालसम्म त्यस्तो समस्या नदेखिएको बताए ।
हालसम्म ग्राहकलाई नियमित रूपमा ग्यास उपलब्ध गराउँदै आएको जानकारी गराउदै उनले ग्यासको खरिद मूल्य बढेका कारण बिक्री मूल्य पनि वृद्धि गरिएको बताए । ढुवानी खर्च बढ्दा मूल्यमा थप प्रभाव परेको उनले बताए । हाल पसलमा सीमित मात्रामा सिलिन्डर मौज्दात रहेकाले ती बिक्री नभए सम्म नयाँ ग्यास नल्याउने उनले बताए ।
बाजुरामा सबैभन्दा बढी ग्यास खपत बुढीगङ्गा नगरपालिकामा हुने गरेको छ । दाउराको अभाव भएका क्षेत्रमा ग्यासको प्रयोग बढी हुने र दाउरा उपलब्ध हुने स्थानमा अझै पनि परम्परागत रूपमा दाउराकै प्रयोग हुने गरेको स्थानीयले बताएका छन ।
पहिले वन क्षेत्रमा दाउरा सहजै उपलब्ध हुने भएकाले ग्यासको प्रयोग न्यून हुने गरेको थियो भने वनहरू सामुदायिक व्यावस्थापनमा गएपछि दाउरा सङ्कलनमा कडाइ गरिएकाले गाउँ बस्तीमा ग्यासको प्रयोग बढ्दै गएको हो ।
