चेत्र ०६ कञ्चनपुर । सुदूरपश्चिम प्रदेशसभाको अधिवेशन पाँच दिन भित्र बोलाउन नेकपाले प्रदेश सरकारको ध्यानाकर्षण गराएको छ । प्रमुख प्रतिपक्षी नेपाली कम्प्युनिस्ट पार्टी सुदूरपश्चिम संसदीय दलले पाँच दिन भित्र अधिवेशन बोलाउन प्रदेश सरकारको ध्यानाकर्षण गराएको हो ।
नेकपा संसदीय दलका नेता खगराज भट्टले दलको बैठक मार्फत पाँच दिन भित्र प्रदेशसभा बैठक आह्वान गर्न सरकारलाई आग्रह गर्ने निर्णय गरेको जानकारी गराए । भट्टले मुख्यमन्त्री कमलबहादुर शाहलाई नियमित अधिवेशन बोलाउन ध्यानाकर्षण गराइएको जानकारी गराए ।
दलको निर्णय अनुसार मुख्यमन्त्रीलाई शुक्रबार भेटेर ध्यानाकर्षण पत्र दिने कार्यक्रम भएको बताउदै नेता भट्टले मुख्यमन्त्री शाह बाहिर भएकाले फोनबाटै मौखिक रूपमा ध्यानाकर्षण गराएको बताए । शनिबार मुख्यन्त्रिको हातमा ध्यानाकर्षण पत्र बुझाउने बताउदै भट्टले मुख्यमन्त्री शाहमाथि भ्रष्टाचार आरोप लागेको भए पनि जनताका आवाज उठाउने सदन नचल्दा समस्या भएको बताए ।
बजेट अधिवेशन बोलाउने बेला भइसक्दा समेत सुदूरपश्चिम प्रदेश सरकारले यस वर्षको हिउँदे अधिवेशन नबोलाएको उनले बताए । गत जेठमा सुरु भएको बजेट अधिवेशन माघ २५ मा अन्त्य गरिएको थियो । प्रदेश सरकारको मन्त्रिपरिषद्ले निर्णय गरी प्रदेशसभाको अधिवेशन बोलाउन सिफारिस गरेपछि प्रदेश प्रमुखले अधिवेशन आह्वान गर्ने कानुनी व्यवस्था रहेको छ ।
