चैत्र ०४ धनगढी । सुदूरपश्चिम प्रदेश सरकारले चालु आर्थिक वर्ष २०८२–०८३ को आठ महिनामा झण्डै १० प्रतिशत विकास खर्च गरेको छ । कुल १९ अर्ब ८२ करोड २३ लाख ५६ हजार रुपैयाँको पुँजीगत बजेट मध्ये प्रदेश सरकारले फागुन मसान्त सम्म जम्मा ९.९९ प्रतिशत अर्थात झण्डै १० प्रतिशत विकास खर्च गरेको हो ।
प्रदेश लेखा नियन्त्रक कार्यालयका अनुसार उक्त अवधिमा एक अर्ब ९७ करोड ९७ लाख १० हजार ५ सय ९ रुपैयाँ मात्र खर्च भएको छ । अझै १७ अर्ब ८४ करोड २६ लाख ४५ हजार ४ सय ९१ रुपैयाँ खर्च हुन बाँकी रेको छ भने आर्थिक वर्ष सकिन चार महिना मात्र बाँकी रहेको छ ।
अघिल्ला वर्षहरूको तुलनामा पनि यस वर्षको खर्च अवस्था कमजोर देखिएको छ । गत आर्थिक वर्ष २०८१–०८२ मा छ महिनामा १० प्रतिशत र २०८०–०८१ मा १२ प्रतिशत पुँजीगत बजेट खर्च भई सकेको थियो । सबैभन्दा धेरै बजेट रहेको भौतिक पूर्वाधार विकास मन्त्रालयले १४ अर्ब ७१ करोड ६३ लाख २३ हजार रुपैयाँ मध्ये ११.२१ प्रतिशत मात्र खर्च गर्न सकेको छ ।
विकास बजेट खर्च कम हुनुमा टुक्रे आयोजनालाई एउटै शीर्षकमा राखेर बजेट विनियोजन गर्नु, खर्च कटौती गर्ने निर्णय, साना आयोजनाको कार्यान्वयनमा अनिश्चितता जस्ता समस्याहरू रहेका छन् । मुख्यमन्त्री कमल बहादुर शाहले खर्च बढाउन कार्ययोजना बनाउन निर्देशन दिए पनि मन्त्रालयहरूले अहिले सम्म पेश गरेका छैनन् ।
चालुतर्फ भने २७.१७ प्रतिशत बजेट खर्च भएको छ । १३ अर्ब ६० करोड भन्दा बढी चालु बजेट मध्ये तलबभत्ता जस्ता क्षेत्रमा खर्च भए पनि कृषि, स्वास्थ्य, शिक्षा, पर्यटन र उद्योग क्षेत्रमा अपेक्षा अनुसार खर्च हुन सकेको छैन ।
सामाजिक विकास मन्त्रालयले सबैभन्दा बढी ३६.७३ प्रतिशत चालु बजेट खर्च गरेको छ भने भूमि व्यवस्था, कृषि तथा सहकारी मन्त्रालयले १३.१९ प्रतिशत मात्रै खर्च गरेको छ । उद्योग, पर्यटन, वन तथा वातावरण मन्त्रालयको अवस्था झनै कमजोर देखिएको छ । चालुतर्फ ३९.३९ प्रतिशत र पुँजीगततर्फ केवल ३.०३ प्रतिशत बजेट खर्च भएको छ ।
