चैत्र ०४ धनगढी । कैलाली भन्सार कार्यालय धनगढीले आठ महिनाको अवधिमा पाँच अर्ब ४० करोड ६७ लाख राजस्व सङ्कलन गरेको छ । कार्यालयले चालु आर्थिक वर्ष २०८२÷८३ को साउन देखि फागुन मसान्त सम्म पाँच अर्ब ४० करोड ६७ लाख राजस्व सङ्कलन गरेकोे हो ।
कार्यालयले भन्सार महसुलतर्फ दुई अर्ब ८४ लाख, मूल्य अभिवृद्धि करतर्फ दुई अर्ब सात करोड ५९ लाख, अन्तःशुल्कतर्फ १० करोड ५६ लाख र अन्यतर्फ एक अर्ब २१ करोड ६६ लाख राजस्व सङ्कलन गरेको भन्सार कार्यालयका सूचना अधिकारी प्रकाश तिमिल्सिनाले जानकारी गराएका हुन ।
चालु आर्थिक वर्षमा नौ अर्ब ७१ करोड १५ लाख राजस्व सङ्कलन गर्ने वार्षिक लक्ष्य लिएकोमा भन्सार कार्यालयले आठ महिनामा वार्षिक लक्ष्यको ५५ दशमलव ६७ प्रतिशत राजस्व सङ्कलन गरेको उनले जानकारी गराए ।
चालु आर्थिक वर्षका कुनै पनि महिनामा राजस्व सङ्कलन लक्ष्यमा पुग्न नसकेको बताउदै सूचना अधिकारी तिमिल्सिनाले साउनमा ७१ करोड ६१ लाख राजस्व सङ्कलन गर्ने लक्ष्य रहेकोमा ५७ करोड ८० लाख, भदौमा ७४ करोड २१ लाख लक्ष्य रहेकोमा ५३ करोड ७० लाख, असोजमा ७६ करोड ७७ लाख लक्ष्य रहेकोमा ६७ करोड ७८ लाख र कात्तिकमा ८४ करोड ६७ लाख राजस्व सङ्कलनको लक्ष्य रहेकोमा ७२ करोड ५४ लाख मात्रै राजस्व सङ्कलन भएको जानकारी गराए ।
त्यसैगरी मङ्सिर महिनामा ७८ करोड ३३ लाख राजस्व सङ्कलनको लक्ष्य रहेकोमा ६८ करोड ९१ लाख, पुसमा ८१ करोड २५ लाख लक्ष्य रहेकोमा ७४ करोड ६५ लाख, माघमा ७६ करोड नौ लाख लक्ष्य रहेकोमा ६८ करोड ८२ लाख र फागुन महिनामा ७७ करोड १४ लाख लक्ष्य रहेकोमा ७६ करोड ४४ लाख मात्रै राजस्व सङ्कलन भएको उनले जानकारी गराए ।
गत आर्थिक वर्ष २०८१÷८२ मा राजस्व सङ्कलन लक्ष्यमा पुग्न नसकेको बताउदै सूचना अधिकारी तिमिल्सिनाले गत आर्थिक वर्षमा ११ अर्ब १६ करोड २६ लाख राजस्व सङ्कलनको वार्षिक लक्ष्य रहेकोमा आठ अर्ब ६६ करोड ९८ लाख मात्रै राजस्व सङ्कलन भएको जानकारी गराए । वार्षिक लक्ष्यको ७७ दशमलव ६७ प्रतिशत मात्रै राजस्व सङ्कलन भएको उनले जानकारी गराए ।
