फागुन ३० बाजुरा । यस वर्षको माध्यमिक शिक्षा परीक्षा (एसइई)मा बाजुराबाट दुई हजार ४ सय २६ जना विद्यार्थी सहभागी हुने भएका छन् । परीक्षाका लागि आवश्यक हाजिरी पु¥याएका नियमित तर्फका दुई हजार ४ सय २६ जना विद्यार्थी एसइईमा सहभागी हुने भएका हुन । शिक्षा विकास तथा समन्वय एकाइ बाजुराले दुई हजार ४ सय २६ जना विद्यार्थी एसइईमा सहभागी हुने जानकारी गराएको हो ।
परीक्षामा सहभागी हुन विद्यालय सञ्चालन भएको दिनको कम्तीमा ७५ प्रतिशत हाजिरी हुनुपर्ने व्यवस्था रहेको जनाइएको छ । शिक्षा विकास तथा समन्वय एकाइ बाजुराका सूचना अधिकारी लालबहादुर विष्टका अनुसार यस वर्षको एसइई परीक्षा चैत १७ गते देखि सुरु भई चैत २९ गते सम्म सञ्चालन हुनेछ । परीक्षा बिहान ८ बजे देखि ११ बजेसम्म हुने राष्ट्रिय परीक्षा बोर्डले तालिका सार्वजनिक गरिसकेको छ ।
कुल परीक्षार्थीको सङ्ख्या तय भए पनि कति छात्रा र कति छात्र सहभागी हुने भन्ने विवरण भने अझै छुट्याइएको छैन । एसइई परीक्षाका लागि बाजुरामा १७ वटा परीक्षा केन्द्र तोकिएका छन् । केही दिनभित्रै केन्द्राध्यक्ष चयन गरी गत वर्षझैँ यस वर्ष पनि परीक्षालाई स्वच्छ र सभ्य रूपमा सञ्चालन गर्ने तयारी भइरहेको सूचना अधिकारी लाल बहादुर विष्टले जानकारी गराए । जिल्लाका केही विद्यालयमा प्राविधिक शिक्षा समेत सञ्चालन हुँदै आएको छ ।
भानोदय माध्यमिक विद्यालयमा पशु विज्ञान तथा दशरथ र कीर्तिचौर माध्यमिक विद्यालयमा बाली विज्ञान विषयको पठनपाठन भइरहेको छ । कृषि क्षेत्रमा परिवर्तन ल्याउने उद्देश्यले ती विद्यालयमा पछिल्लो समय कक्षा ९ र १० मा प्राविधिक कक्षा सञ्चालन गरिएको हो । गत वर्षको नतिजा हेर्दा बाजुरामा एसइई परीक्षामा सुधार देखिएको छ ।
२०८१ सालको एसइई परीक्षामा चार जीपीए ल्याउने विद्यार्थी नभए पनि ३.६ देखि ४.० भन्दा कम जीपीए ल्याउने ३८ जना, ३.२ देखि ३.६ जीपीए ल्याउने २६२ जना, २.८ देखि ३.२ जीपीए ल्याउने ५ सय ३२ जना, २.४ देखि २.८ जीपीए ल्याउने ३ सय ५१ जना र २.० देखि २.४ भन्दा कम जीपीए ल्याउने १६ जना रहेका थिए ।
२०८१ सालको एसइई परीक्षामा दुई हजार २ सय १६ जना सहभागी भएका मध्ये एक हजार १ सय ९९ जना उत्तीर्ण भएका थिए । त्यसैगरी २०८० सालमा दुई हजार ८ सय ३४ जना विद्यार्थी एसइईमा सहभागी भएकोमा एक हजार पाँच जना मात्र उत्तीर्ण भएका थिए ।
२०८० सालको एसइई परीक्षामा चार जीपीए ल्याउने विद्यार्थीको सङ्ख्या शून्य रहेको थियो । ३.६ देखि ४.० भन्दा कम जीपीए ल्याउने आठ जना, ३.२ देखि ३.६ जीपीए ल्याउने ८४ जना, २.८ देखि ३.२ जीपीए ल्याउने ४ सय ४ जना, २.४ देखि २.८ जीपीए ल्याउने ४ सय ६५ जना र २.० देखि २.४ भन्दा कम जीपीए ल्याउने ४४ जना रहेका थिए ।
२०८० सालमा उत्तीर्ण दर करिब ४५ प्रतिशत रहेकोमा २०८१ सालमा ग्रेड प्राप्त गर्ने विद्यार्थीको प्रतिशत ५१.७२ पुगेको थियो । यसले २०८० को तुलनामा २०८१ सालमा बाजुराको एसइई नतिजा सन्तोषजनक रूपमा सुधार भएको देखिएको शिक्षा विकास तथा समन्वय एकाइ बाजुराका सूचना अधिकारी विष्टले बताए ।
