फागुन २६ धनगढी । नेपाली सेनाले निर्माण गरिरहेको दार्चुलास्थित निर्माणाधीन तुसारपानी–तिङ्कर सडक निर्माण एक महिना देखि बन्द भएको छ । सडक निर्माणका लागि छुट्याइएको बजेट सकिए पछि सडक निर्माण बन्द भएको हो । नेपाली सेनाको दार्चुला–तिङ्कर सडक आयोजनाका आयोजना प्रमुख एवं प्रमुख सेनानी राजेश कटवालले सडक निर्माण एक महिना देखि बन्द भएको जानकारी गराएका हुन ।

सरकारले चालु आर्थिक बर्ष २०८२÷८३ का लागि तिङ्कर सडक निर्माणमा एक करोड रुपैयाँ मात्रै बजेट विनियोजन गरेको जानकारी गराउदै उनले तिङ्कर सडकमा सेनालाई छ करोड ३१ लाख रुपैयाँ बजेट प्राप्त भएकोमा यसमध्ये सडक निर्माणका लागि एक करोड रुपैयाँ मात्रै बजेट राखिएको बताए ।

सडक निर्माणका लागि विनियोजित बजेट एक करोड रुपैयाँ खर्च भइसकेको जानकारी गराउदै उनले सडक निर्माण कार्य माघ १८ गते देखि बन्द रहेको जानकारी गराए । यसअघि दुईतिरबाट निर्माण भइरहेको सडक बजेट अभावका कारण रोकिएको उनले जानकारी गराए । सरकारले विनियोजन गरेको बाँकी बजेटले भवन निर्माण र मेसिनरी औजार खरिद गर्ने शीर्षकमा रहेको जानकारी गराउदै उनले टाउको लुकाउन सानो छानो भए हुने र भवन नचाहिने बताएका छन ।

भवन निर्माण र मेसिनरी औजार खरिदको बजेट सडक निर्माणमा हालिदिन आग्रह गरेको उनले जानकारी गराए । नेपाली सेनाले निर्माणको जिम्मेवारी पाएको तुसारीपानी–तिङ्कर सडक आयोजनामा प्राप्त बजेटलाई संशोधन गरी सडक निर्माण शीर्षकमा राखिदिन संशोधनको प्रस्ताव सहितको पत्र भौतिक मन्त्रालयलाई पठाएको उनले जानकारी गराए ।

बजेट संशोधन भएको कुनै जानकारी प्राप्त नभएको बताउदै उनले संशोधनको प्रक्रियामै रहेको हुन सक्ने बताए । सेनाले चालु आर्थिक वर्षको विनियोजित बजेटमध्ये चार करोड रुपैयाँ सडक निर्माणमा खर्च गर्न बजेट संशोधनको प्रस्ताव गरेको उनले जानकारी गराए । सेनाको प्रस्ताव अनुसार बजेट संशोधन नहुँदा सडक निर्माण ठप्प बनेको उनले बताए ।

स्थानीय जनकसिंह धामीले व्यास गाउँपालिकाको माल र दुम्लिङ क्षेत्रका बासिन्दाले सडक निर्माणमा रोजगारी पाइरहेको बताउदै निर्माण बन्द हुँदा अहिले बेरोजगार हुनु परेको बताए । नेपाली सेनाले पुस मसान्त सम्मको अवधिमा व्यास गाउँपालिका वडा नम्बर–२, आतुङ्ती र कल्जु क्षेत्र जोड्ने गरी सडकको ट्र्याक खोलेको बताउदै उनले सडक निर्माण भएपछि व्यासको छाङरु जोड्ने पैदल बाटो पनि सञ्चालनमा आएको बताए ।

सेनाको प्रस्ताव अनुसार बजेट संशोधन भएपछि चालु आर्थिक बर्षमा चार करोड बजेट खर्च गरेर एक हजार चार सय मिटर ट्र्याक निर्माण र एक हजार दुई मिटर सडक स्तरोन्नति गर्ने लक्ष्य राखिएको प्रमुख सेनानी कटवालले बताए । प्रर्याप्त बजेट उपलब्ध भएमा हेलिकोप्टर मार्फत सडक निर्माणमा प्रयोग हुने ठुलठुला मेसिन ढुवानी गरी सडक निर्माणको काम अघि बढाउन सकिने प्रमुख सेनानी कटवालले बताए ।

तुसारपानी देखि तिङ्कर सम्मको ७९ किलोमिटर मध्ये नेपाली सेनाले हाल सम्म १८.५ किलोमिटर सडकको ट्र्याक खोलिसकेको उनले जानकारी गराए । आर्थिक बर्ष २०७७÷७८ देखि उक्त सडकलाई नेपाली सेनाले निर्माण गरिरहेको जानकारी गराउदै प्रमुख सेनानी कटवालले नेपाली सेनाले चालु आर्थिक बर्षमा छाङ्ररुबाट तल एक किलोमिटर सडकको नयाँ ट्र्याक खोलेको जानकारी गराए ।

यस वर्षको बजेट अनुसार १.४ किलोमिटर सडक निर्माणको लक्ष्य पाएको सेनाले एक किलोमिटर सडक निर्माण गरिसकेको उनले बताए । लक्ष्य अनुसार निर्माण गर्न बाँकी रहेको चार सय मिटर सडक निर्माणको काम तत्काल सम्पन्न गरिने जानकारी गराउदै उनले नेपाली सेनाले गत वर्ष ८.५ किलोमिटर र यस वर्ष छ सय मिटर सडकको स्तरोन्नति गरेको बताए ।