फागुन ०४ धनगढी । कैलालीमा शिशु स्याहार र प्राथमिक उपचार केन्द्र स्थापना ग रिएको छ । नेपाल उद्योग वाणिज्य महासंघ एफएनसीसीआईद्वारा सञ्चालित सशक्त महिला सम्वृद्ध नेपाल कार्यक्रमले गोदावरी नगरपालीका वडा नम्बर–६, कैलालीमा रहेको ग्रीन होम प्रा.लिको परिसरमा शिशु स्याहार, प्राथमिक उपचार केन्द्र तथा स्तनपान कक्ष स्थापना गरेको हो ।
अन्तर्राष्ट्रिय श्रम संगठन नेपालको आर्थिक तथा प्राविधिक सहयोगमा शिशु स्याहार, प्राथमिक उपचार केन्द्र तथा स्तनपान कक्ष स्थापना गरिएको हो । करिब १० लाखको लगानीमा तयार गरिएको संरचनामा बालबच्चा भएका महिला कर्मचारीहरूले आफ्नो बच्चाको समय–समयमा हेरचाह गर्न पाउने भएका छन् ।
“संरचनाभित्र बालबच्चाका लागि पोषणयुक्त खानेकुराको लागि आवश्यक साधन, खेलकुद सामग्री सहितको व्यवस्था गरिएको छ । कक्षमा उनीहरूको लागि उद्योगले सहजकर्ता समेत राख्ने महासंघले जारी गरको विज्ञप्तिमा उल्लेख गरिएको छ ।
कम्पनीमा बालबच्चाको समस्याको कारण देखाउँदै अनुभवी महिला कर्मचारीहरूले काम छोड्ने समस्या बढ्न थालेपछि उनीहरूको सन्तानलाई पनि राम्रो वातावरण दिने गरी उद्योग परिसरमा शिशु स्याहार केन्द्र स्थापना गरिएको उद्योगका सञ्चालक लम्सालले जानकारी गराए । लम्सालले उद्योगमा अहिले ९२ जना महिला र ३२ जना पुरुष कर्मचारी रहेको बताए ।
उद्योगमै आफ्ना बालबच्चाहरूको हेरचाह गर्न पाउने भएपछि महिला श्रमिकहरू उत्साहित भएको र शिशु स्याहार केन्द्रमा बालबालिकाहरूको खेल्दै सिक्ने प्रक्रिया अघि बढ्ने उद्योग वाणिज्य महासंघका सहायक निर्देशक हरि पौडेलले बताए । शिशु स्याहार केन्द्र तथा स्तनपान र ड्रेसिङ रुम स्थापनाको लागि उद्योगले भौतिक संरचना उपलब्ध गरेको हो ।
स्याहार केन्द्रको उद्घाटन गर्दै नेपाल उद्योग वाणिज्य महासंघका कोषाध्यक्ष भरतराज आचार्यले यस्ता पहलहरूले अवैतानिक हेरचाह कार्यको बोझ कम गर्दै दिगो विकास र जनशक्ति स्थायित्व जस्ता व्यापक लक्ष्यहरूसँग समन्वय गर्ने बताए ।
“केयर–अर्थतन्त्रको हिस्साका रूपमा निजी क्षेत्रको साझा प्रतिबद्धता अन्तर्गत, उद्योगका कर्मचारी, विशेषगरी महिलाहरूका लागि कार्यस्थलमै बाल हेरचाह केन्द्र स्थापना भएको बताउदै उनले यसले कामकाजी अभिभावकहरूलाई सहयोग गनुैका साथै लैंगिक समानता प्रवद्र्धन गर्ने बताए । यो अभ्यासलाई अन्य उद्योगहरूले पनि अनुशरण गर्नुपर्ने उनले बताए ।
