वैशाख १२ विराटनगर । प्रहरीले ६ लाख ४१ हजार नगद सहित सात जना जुवाडेलाई पक्राउ गरेको छ । आइतबार मोरङको ग्रामथान गाउँपालिका वडा नम्बर ४ कटहराबाट सात जनालाई पक्राउ गरेको हो । पक्राउ पर्नेहरू झापा, सुनसरी र मोरङका छन् ।
मोरङ प्रहरीका प्रवक्ता डीएसपी दीपक श्रेष्ठका अनुसार झापाको मेचीनगर नगरपालिका वडा नम्बर ६ का ५७ वर्षीय हरिसचन्द्र गिरी, दमक नगरपालिका वडा नम्बर २ का ३६ वर्षीय निलम लिम्बू र सुनसरीको धरान उप महानगरपालिका वडा नम्बर ६ का ४४ वर्षीय सन्तोष थापामगर, मोरङ ग्रामथान वडा नम्बर ५ का ५४ वर्षीय रूपेशकुमार तामाङ, ४७ वर्षीय सुरेशकुमार थारु, २८ वर्षीय रञ्जित साह र ग्रामथान वडा नम्बर ४ का ४७ वर्षीय सत्यनारायण राजवंशीलाई जुवा खालबाट पक्राउ गरिएको
हो ।
उक्त स्थानमा विगत एक वर्षदेखि नियमित जुवाको खाल सञ्चालन गरिएको सूचना पाए पनि यस अघि पटक पटक प्रयास गर्दा प्रहरी असफल भएको थियो ।
पक्राउ परेका विरुद्ध प्रहरीले जुवा ऐन अन्तर्गतको मुद्दा चलाउने तयारी गरेको बताईएको छ ।
