माघ २६ अछाम । सडक बोर्ड नेपालले योजना कार्यान्वयनका क्रममा १० प्रतिशत रकम कमिसन माग्ने गरेको आरोप लगाउँदै अछामको ढकारी गाउँपालिकाले सडक मर्मत सम्भारका लागि स्वीकृत बजेट फिर्ता गरेको छ । गाउँपालिकाले आर्थिक वर्ष २०८२÷०८३ का लागि स्वीकृत १० लाख ८० हजार बजेट फिर्ता गरेको हो ।
ढकारी गाउँपालिकाका अध्यक्ष प्रकाश बहादुर साउदद्वारा सडक बोर्ड नेपाललाई पठाइएको पत्रमा बजेट कार्यान्वयन गर्न नसकिएको जानकारी गराइएको छ । पत्र अनुसार सडक बोर्ड मार्फत योजना कार्यान्वयन गर्दा भुक्तानी प्रक्रियामा १० प्रतिशत कमिशन मागिने अवस्था सिर्जना भएकाले बजेट स्वीकार गर्न नसकिएको उल्लेख गरिएको छ ।
गाउँपालिकाका अध्यक्ष प्रकाश बहादुर साउँदले कुनै पनि किसिमको अनौपचारिक वा गैरकानुनी रकम दिन नसकिने भएकाले पत्र लेखेको बताएका छन् । कमिशन माग्ने प्रवृत्तिका कारण स्वीकृत बजेट समेत कार्यान्वयन गर्न नसकिएको अध्यक्ष साउँदले बताए । सडक बोर्ड नेपालका कार्यकारी निर्देशक गणेशबहादुर केसीले सडक बोर्ड नेपालले देशभरका ७ सय ५३ वटै स्थानीय तहमा काम गरिरहेको बताए ।
उनले अन्य पालिकाका बोर्डले राम्रो काम गर्ने तर अछामको ढकारीमा मात्रै कमिसन माग्ने पत्र लेखिएको प्रति बोर्डको ध्यानाकर्षण भएको बताएका छन । उनले कमिसन मागिएको विषयमा प्रमाण पेश गर्न पालिकालाई लेखि पठाइएको बताए । पालिकाले लगाएको आरोप प्रमाणित भए संलग्नलाई आवश्यक कानुनी कारबाही गर्ने बताएका छन् ।
