माघ २५ कञ्चनपुर । कञ्चनपुरमा जङ्गली हात्तीको आक्रमणबाट एक जना बालिकाको मृत्यु भएको छ । बञ्चनपुरको लालझाँडी गाउँपालिका वडा नम्बर–६,ढक्का चानदेवमा जङ्गली हात्तीको आक्रमणबाट ६ वर्षीया रोजिना साउदको मृत्यु भएको हो ।
जिल्ला प्रहरी कार्यालय कञ्चनपुरले बनीबार राति करिब २ः३० बजेको समयमा जङ्गली हात्ती स्थानीय किसन सिंह साउदको घरमा प्रवेश गरी आक्रमण गरेको जानकारी गराएको छ ।
घरबाट ज्यान जोगाउन भाग्ने क्रममा साउदकी ५५ वर्षीया आमा पार्वती साउद र ६ वर्षीया छोरी रोजिनालाई हात्तीले आक्रमण गरेको जानकारी गराउदै प्रहरीले उपचारका क्रममा रजीनाको मृत्यु भएको जानकारी गराएको हो ।
प्रहरी नायब उपरीक्षक तथा जिल्ला प्रहरी कार्यालयका प्रवक्ता हेमबहादुर शाहीले गम्भीर घाइते दुवै जनालाई उपचारका लागि टीएनडी अस्पताल झलारी लगिएकोमा अवस्था थप गम्भीर भएपछि राति नै धनगढी रेफर गरिएको जानकारी गराउदै ६ वर्षीया रोजिनाको नवजीवन अस्पतालमा उपचारका क्रममा निधन भएको बताए ।
पार्वती साउदको अवस्था मध्यम रहेको जानकारी गराउदै उनले निकुञ्ज क्षेत्रबाट बस्तीमा प्रवेश गर्ने जङ्गली हात्तीका कारण स्थानीयवासी त्रसित बनेको बताए ।
