माघ २० धनगढी । कैलालीको धनगढीमा निजी क्षेत्रबाट क्रिकेट मैदान निर्माणको काम सुरु गरिएको छ । धनगढी उपमहानगरपालिका वडा नम्बर–३ फाप्ला मैदान नजिकै पाँच बिगाह क्षेत्रफलमा क्रिकेट मैदान निर्माणको काम सुरु गरिएको हो ।
फाप्ला खेलग्रामका अध्यक्ष समेत रहेका सुवाश शाही र मोहन साउँदको लगानीमा क्रिकेट मैदान सहित पार्क निर्माणको शिलान्यास गरी निर्माणको काम सुरु गरिएको हो ।
फाप्ला खेलग्रामका अध्यक्ष शाहीले मैदानमा छ वटा पिच बनाइने जानकारी गराउदै क्रिकेट मैदानमा अन्तर्राष्ट्रिय मापदण्ड अनसार ६५ देखि ७५ मिटर सम्मको बाउण्ड्री रहने जानकारी गराए ।
पर्खाल निर्माण देखि मैदान सम्याउने सम्मको काम सम्पन्न भइसकेको जानकारी गराउदै शाहीले सोमबार देखि पिच निर्माणको काम सुरु गरिएको बताए ।
रुपन्देहीमा एक्स्ट्राटेक ओभल क्रिकेट मैदान तयार गरेका क्युरेटर माधव पाठकले पिच निर्माणको काम गरिरहेको जानकारी गराउदै शाहीले फाप्ला अन्तर्राष्ट्रिय क्रिकेट रंगशाला तथा खेल ग्रामको डीपीआर र इआइए स्वीकृत भइसकेको बताए ।
रंगशाला निर्माण र पूर्वाधार विकास कार्यान्वयनको बाटो स्पष्ट भएको बताउदै शाहीले अभियानलाई बलियो आधार दिन धनगढी ओभलको शिलान्यास गरेको बताए ।
धनगढी ओभलमा चरणबद्ध रुपमा पूर्वाधार विकास गरिने बताउदै उनले केवल मैदान निर्माण मात्र नभई ग्रासरुट सशक्तिकरण तथा खेल पर्यटन प्रवद्र्धनका लागि पनि भएको बताए ।
आर्थिक गतिविधि विस्तार र सुदूरपश्चिम प्रदेशको खेल पहिचानलाई राष्ट्रिय गौरवमा रूपान्तरण गर्ने साझा अभियान भएको बताउदै उनले पहिलो चरणमा पिच निर्माण, इरिगेसन र ड्रेनेज प्रणाली जडानको काम भइरहेको बताए ।
दोस्रो चरणमा पवेलियन, चेन्जिङ रुम तथा नेट अभ्यास गर्ने ठाउँ तयार गरिने बताउदै शाहीले तेस्रो चरणमा प्याराफिट निर्माण र फ्लड लाइट जडानको कामसँगै मैदानको बाहिर पट्टीको भागमा फुड कर्नर देखि अन्य व्यवसायिक स्टलहरु पनि तयार गरिने बताए ।
क्रिकेटका पूर्वखेलाडी समेत रहेका क्रिकेट विकासका अभियान्ताका रुपमा परिचित शाहीको अगुवाईमा धनगढीमा एसपीए कपको थालनी गरिएको थियो । नेपालमा पहिलोपटक अक्सन बेसमा आधारित धनगढी क्रिकेट लिग पनि शाहीले नै आयोजना गरेका थिए ।
उनकै अग्रसरतामा धनगढी प्रिमियर लिग (डिपिएल) प्रतियोगिताको पनि आयोजना भएकोमा पछिल्लो समय शाहीले अर्जुन ट्रफी राष्ट्रिय क्रिकेट प्रतियोगीता आयोजना गर्दै आएका छन् ।
