माघ १८ धनगढी । कैलालीको कैलारी गाउँपालिका वडा नम्बर–५ गोबरेलाका किसान सनोज चौधरीले माछापालन व्यवसायबाट मनग्य आम्दानी गर्दै आएका छन ।
दश कट्ठा क्षेत्रफलमा व्यावसायिक रूपमा माछापालन व्यवसाय गर्दै आएका चौधरीले माछापालन व्यवसायबाट मनग्य आम्दानी गर्दै आएका हुन ।
१३ लाख बराबरको माछा बिक्री गरेको जानकारी गराउदै उनले सबै खर्च कटाएर दुई लाख ५० हजार बचत गर्दै आएको बताए । खेतीकिसानीसँगै केही नयाँ काम गरौँ भन्ने योजनाले माछापालन व्यवसाय सुरु गरेको चौधरीले बताए ।
व्यवसायको सुरुवातमा कामको कुनै अनुभव नभएको बताउदै उनले व्यवसायमा नयाँ भएकाले सुरुका वर्षमा पोखरीमा माछा मरेर क्षति व्यहोर्नु परेको बताए । पछि विस्तारै व्यवसाय प्रति अनुभव बटुल्दै गएपछि अहिले मनग्य आम्दानी हुँदै गएको उनले बताए ।
जीविकोपार्जनका लागि कुनै समस्या नभएको बताउदै चौधरीले अहिले पोखरीमा पङ्गासेस, कमन कार्प, ग्रास, रहुँ जातका माछा भएको बताए । माछा होलसेलमा प्रतिकिलो २ सय ५० र फुटकरमा प्रतिकिलो ३ सय रुपैयामा बिक्री हुने गरेको उनले जानकारी गराए ।
माछा बिक्रीका लागि बजारको समस्या नभए पनि अवैध रूपमा भारतीय माछा भित्रिने गरेकाले बिक्री दरमा वृद्धि हुन नसकेको चौधरीको गुनासो छ ।
भारतबाट आयात भएका माछाको मूल्य होलसेलमा प्रतिकिलो २ सय २० र फुटकरमा प्रतिकिलो २ सय ८० मा बिक्री हुने भएकाले स्थानीय उत्पादनको बिक्रीमा केही कठिनाइ हुने गरेको उनले बताए ।
उत्पादित माछा धनगढी, टीकापुर र केही स्थानीय बजारमा बिक्री हुने गरेको चौधरीले बताए ।
माछापालनका लागि सुरुमा पोखरी निर्माण गर्दा भेटेरिनरी अस्पताल तथा पशुसेवा विज्ञ केन्द्रबाट १० हजार प्रतिकट्ठाका दरले एक लाख र कैलारी गाउँपालिकाबाट ५० हजार बराबरको बोरिङ सहित पानी तान्ने मोटर र जाल अनुदानमा प्राप्त भएको बताउदै उनले व्यवसाय सञ्चालनमा सहज भएको बताए ।
पछिल्लो समयमा भेटेरिनरी अस्पताल तथा पशुसेवा विज्ञ केन्द्र तथा स्थानीय सरकारले व्यावसायिक कृषिमा आवद्ध हुन चाहने किसानलाई अनुदान सहयोग गर्न थालेपछि गोबरेलामा व्यावसायिक रूपमा माछापालन गर्ने किसानको सङ्ख्या बढ्दै गएको पशुसेवा विज्ञ केन्द्रले जानकारी गराएको छ ।
