माघ ०३ बझाङ । बझाङका अधिकांश ग्रामीण बस्तीका स्थानीय अझै अँध्यारोमा बस्न बाध्य भएका छन् । सरकारले सन् २०२६ भित्र देशका सबै ग्रामीण क्षेत्रमा विद्युतिकरण गरी सक्ने घोषणा गरेको भए पनि झाङका अधिकांश ग्रामीण बस्तीका स्थानीय अझै अँध्यारोमा बस्न बाध्य भएका हुन ।
सरकारले आर्थिक वर्ष २०८१–८२ को नीति तथा कार्यक्रममा सुदूरपश्चिम र कर्णाली प्रदेशका सबै क्षेत्रमा विद्युतिकरण गर्ने घोषणा गरेको भमए पनि घोषणा भएको वर्ष बितिसक्दा पनि बझाङका ग्रामीण बस्ती अझै अध्यारोमा रहेका छन ।
जयपृथ्वी नगरपालिकाका अधिकांश गाउँमा राष्ट्रिय प्रसारण लाइन विस्तार भइसकेको भए पनि जिल्लाका अन्य ११ वटा स्थानीय तहका ग्रामीण क्षेत्रका बासिन्दा अझै अँध्यारोमा जीवन बिताइरहेका छन् ।
बुंगल नगरपालिका, केदारस्युँ गाउँपालिका, दुर्गाथली, छबिसपाथिभेरा, खप्तडछान्ना, सुर्मा, तल्कोट र मष्टा गाउँपालिकाका अधिकांश क्षेत्रमा विद्युतिकरण हुन अझै बाँकी रहेको छ । हालसम्म जयपृथ्वी नगरपालिका, बित्थडचिर गाउँपालिका र थलारा गाउँपालिकाका अधिकांश बस्तीमा मात्र राष्ट्रिय प्रसारण लाइन पुगेको छ ।
साइपाल गाउँपालिकाका केही बस्ती भने लघु जलविद्युत आयोजनाबाट लाभान्वित भए पनि अधिकांश आयोजनाहरू बिग्रिएका कारण स्थानीइ बासिन्दा अझै अँध्यारोमा जीवन बिताइरहेका छन् ।
सरकारले राष्ट्रिय विद्युत प्राधिकरणको प्रणालीमा नजोडिएका क्षेत्रहरूमा लघु तथा साना जलविद्युत, सौर्य र वायु ऊर्जा प्रविधि मार्फत विद्युतीयरण गर्ने योजना अघि सारेको भए पनि अहिलेसम्म प्रभावकारी रूपमा कार्यान्वयन हुन सकेको छैन ।
बुंगल नगरपालिका निवासी गोबिन्द बहादुर जाग्रीले विद्युत वितरण सबस्टेसनलाई स्वचालित बनाउने र स्थानीय तहसँग समन्वयमा स्मार्ट मिटर वितरण गर्ने योजना भए पनि दुर्गम ग्रामीण भेगमा विद्युत् नपुगेकाले कार्यान्वयन कहिले हुने हो भन्ने विषयमा स्थानीयवासी अनभिज्ञ रहेको बताए ।
स्थानीय बासिन्दाले सरकारी घोषणामा सीमित नरही व्यावहारिक कार्यान्वयनमा जोड दिँदै विद्युतिकरणको काम अघि बढाउन सरकारसँग माग गरेका छन ्।
